اسرائیلی حکام نے امام مسجداقصی کے سفر پر پابندی عاید کر دی

مقبوضہ بیت المقدس (اُردو پوائنٹ اخبارتازہ ترین - این این آئی۔ 26 مارچ2021ء) قابض صہیونی حکام نے مسجد اقصی کے امام وخطیب الشیخ عکرمہ صبری کے بیت المقدس سے باہر جانے پر دوماہ کے لیے پابندی عاید کر دی ہے۔غیرملی خبررساں ادارے کے مطابق بیت المقدس کے مقامی ذرائع نے بتایا کہ صہیونی حکام نے الشیخ عکرمہ صبری کو ایک نوٹس جاری کیا جس میں کہا گیا کہ وہ دو ماہ تک بیت المقدس سے باہر نہیں جا سکتے۔

(جاری ہے)

ان کے سفر پر پابندی کی مدت میں مزید توسیع ہوسکتی ہے۔دوسری طرف الشیخ عکرمہ صبری نے اسرائیلی فوج کی طرف سے عاید کردہ پابندی کو غیرمنصفانہ اور غیرقانونی قرار دے کر مسترد کردیا ہے۔ ان کا کہنا تھا کہ اس طرح کی نارروا پابندیوں کا مقصد انہیں ان کی ذمہ داریوں کی انجام دہی سے روکنا ہے۔ادھر ایک دوسری پیش رفت میں قابض فوج نے بیت المقدس میں مسجد اقصی کے باب رحمت کے سامنے سے القصراوی خاندان کی ایک لڑکی کوحراست میں لینے کے بعد نامعلوم مقام پرمنتقل کردیا ہے۔