Live Updates

درجہ حرارت 50 ڈگری سینٹی گریڈ تک پہنچ جانے کا امکان

پاکستان جھلسا دینے والی گرمی کی لپیٹ میں آ رہا ہے، غیر ملکی ماہر موسمیات نے پاکستان میں طویل گرمیوں پر تشویش کا اظہار کر دیا

محمد علی منگل 26 اپریل 2022 20:17

لاہور (اُردو پوائنٹ اخبارتازہ ترین۔ 26 اپریل2022ء) درجہ حرارت 50 ڈگری سینٹی گریڈ تک پہنچ جانے کا امکان، پاکستان جھلسا دینے والی گرمی کی لپیٹ میں آ رہا ہے، غیر ملکی ماہر موسمیات نے پاکستان میں طویل گرمیوں پر تشویش کا اظہار کر دیا۔ تفصیلات کے مطابق جنگ نیوز میں شائع ہونے والی رپورٹ میں بتایا گیا ہے کہ اسکاٹ لینڈ سے تعلق رکھنے والے ماہر موسمیات اسکوٹ ڈنکین نے پاکستان اور بھارت میں طویل گرمیوں پر تشویش کا اظہار کرتے ہوئے کہا ہے کہ پاکستان اور بھارت مارچ کے ابتداء سے ہی گرمی کی لپیٹ میں رہے ہیں، دونوں ممالک جھلسا دینے والی گرمی کی لپیٹ میں آرہے ہیں۔

حالیہ گرمی کے دوران درجہ حرارت اپریل کی ریکارڈ سطح تک پہنچ سکتا ہے۔ ماہر موسمیات اسکاٹ لینڈ نے کہا کہ پاکستان کے کچھ حصے میں درجہ حرارت 50 ڈگری سینٹی گریڈ تک رہ سکتا ہے۔

(جاری ہے)

غیر ملکی ماہر موسمیات ک مطابق جیسے جیسے ہمارا سیارہ گرم ہوتا جائے گا، گرمی کی لہریں زیادہ شدید ہوتی جائیں گی۔ دوسری جانب محکمہ موسمیات کے مطابق ملک کے جنوبی اور وسطی علاقوں میں دن کا درجہ حرارت معمول سے 6 سے8 جبکہ بالائی علاقوں میں 5 سے7ڈگری سینٹی گریڈ زیادہ رہنے کا امکان ہے۔

جبکہ نیشنل ڈیزاسٹر مینجمنٹ اتھارٹی (این ڈی ایم ای) نے منگل سے 2 مئی تک ملک بھر میں درجہ حرارت میں غیر معمولی اضافے کا الرٹ جاری کردیا۔ لاہور سمیت پنجاب کے کئی شہروں کیلئے عید کی آمد سے قبل ہیٹ ویو کا الرٹ جاری کیا گیا ہے۔ ماہرین نے آنے والے دنوں انتہائی شدت والی گرمی کی لہر کی آمد کی تشویش ناک پیشن گوئی کی ہے۔ سٹی 42 نیوز کی رپورٹ کے مطابق اس حوالے سے پی ڈی ایم اے نے بھی الرٹ جاری کیا ہے۔

جاری الرٹ کے مطابق پنجاب میں گرمی کی شدت میں غیر معمولی اضافے کا امکان ہے ۔ پی ڈی ایم اے کی رپورٹ کے مطابق پنجاب کے کئی علاقے 26 اپریل سے 2 مئی تک قیامت خیز گرمی کی لہر کی زد میں رہیں گے، درجہ حرارت میں 7-8 ڈگری سینٹی گریڈ کے اضافے کا امکان ظاہر کیا گیا ہے۔ انتہائی شدت والی گرمی کی لہر کی آمد کے پیش نظر تمام متعلقہ اداروں کو الرٹ رہنے کی ہدایت کی گئی ہے۔