الیکشن میں حصہ نہیں لینے دیں گے تو حالات خراب ہوں گے، چیئرمین پی ٹی آئی

صفاف شفاف اور بروقت انتخابات کے لیے ہم سب سے بات کرسکتے ہیں، الیکشن میں حصہ نہ لینے دیں، عوامی خواہش کے برعکس چلیں گے تو حالات خراب ہوں گے، بیرسٹر گوہر

دانش احمد انصاری بدھ 20 دسمبر 2023 22:20

الیکشن میں حصہ نہیں لینے دیں گے تو حالات خراب ہوں گے، چیئرمین پی ٹی ..

اسلام آباد (اردو پوائنٹ، تازہ ترین اخبار، 20 دسمبر 2023) چیئرمین پی ٹی آئی بیرسٹر گوہر نے کہا ہے کہ الیکشن میں حصہ نہیں لینے دیں گے تو حالات خراب ہوں گے۔ انہوں نے نجی ٹی وی چینل اے آر وائے نیوز کے پروگرام میں گفتگو کرتے ہوئے کہا کہ صفاف شفاف اور بروقت انتخابات کے لیے ہم سب سے بات کرسکتے ہیں، الیکشن میں حصہ نہ لینے دیں، عوامی خواہش کے برعکس چلیں گے تو حالات خراب ہوں گے۔

بیرسٹر گوہر خان نے کہا کہ الیکشن کمشنر نے کہا تھا شیڈول سے پہلے کوئی ڈائریکشن نہیں دے سکتے، شیڈول کے بعد لیول پلیئنگ فیلڈ یقینی بنائی جائے گی اب امید ہے کہ الیکشن کمیشن ہمیں انتخابی مہم چلانے دے گی اگر اب بھی انتخابی مہم نہیں چلانے دی گئی تو سپریم کورٹ جائیں گے۔ ان کا کہنا تھا کہ اب قانون تبدیل ہوگیا ہے ایک امیدوار صرف دو حلقوں سے الیکشن لڑ سکتا ہے، میں این اے 10 بونیر سے الیکشن لڑوں گا۔

(جاری ہے)

چیئرمین پی ٹی آئی کا کہنا تھا کہ نواز شریف کے پاس مستقبل کا کوئی منصوبہ نہیں وہ اپنے مسائل بتاتے ہیں، وہ چاہیں جس حلقے سے لڑکیں وہ ضرور الیکشن ہاریں گے۔ ان کا مزید کہنا تھا کہ نواز شریف کو وزیراعظم بنتے بھی نہیں دیکھ رہا وہ ابھی بھی نااہل ہیں وہ کاغذات نامزدگی جمع کروائیں گے تو مسترد ہوجائے گا۔ چیئرمین پی ٹی آئی بیرسٹر گوہر خان نے کہا کہ صفاف شفاف اور بروقت انتخابات کے لیے ہم سب سے بات کرسکتے ہیں۔

انہوں نے کہا کہ نواز شریف نے کبھی نہیں کہا انتخابات وقت پر ہونے چاہئیں، مولانا فضل الرحمان کی کوشش رہی انتخابات تاخیر کا شکار ہوں۔ چیئرمین پی ٹی آئی نے کہا کہ سیاسی اور معاشی استحکام نہ آیا تو ملک انارکی کی طرف بڑھے گا۔ ایک سوال کے جواب میں ان کا کہنا تھا کہ اعتزاز احسن پی ٹی آئی میں شامل ہوجائیں گے، بانی پی ٹی آئی کی بھی یہی خواہش ہے۔