قومی اسمبلی ،آصفہ بھٹو نے بطور رکن حلف اٹھالیا، اپوزیشن کا شدید احتجاج

پیر 15 اپریل 2024 20:35

اسلام آباد (اُردو پوائنٹ اخبارتازہ ترین - این این آئی۔ 15 اپریل2024ء) قومی اسمبلی کے اجلاس میں نو منتخب رکن قومی اسمبلی آصفہ بھٹو نے ایوان کی رکنیت کا حلف اٹھا لیا۔پیر کو اسپیکر قومی ایاز صادق نے نو منتخب رکن آصفہ بھٹو سے رکن اسمبلی کا حلف لیا ۔ حلف کے موقع پر پی ٹی آئی کارکنوں نے ایوان میں شدید شور شرابا کیا۔بلاول بھٹو زرداری نے شور سے بچنے کے لئے آصفہ بھٹو کو ہیڈ فون دیا، اپوزیشن ارکان اسمبلی نے بانی پی ٹی آئی کو رہا کرو کے نعرے لگائے۔

(جاری ہے)

آصفہ بھٹو کے حلف اٹھانے کے بعد پیپلزپارٹی کے ارکان اسمبلی نے جئے بھٹو کے نعرے لگائے۔بعد ازاں آصفہ بھٹو زر داری نے رول آف رجسٹر پر دستخط کئے ۔واضح رہے کہ صدر مملکت آصف زردری کی صاحبزادی آصفہ بھٹو گزشتہ ماہ قومی اسمبلی کے حلقہ این اے 207 نوابشاہ سے بلا مقابلہ کامیاب قرار پائی تھیں۔ضمنی انتخاب میں ان کے مد مقابل تمام امیدوار ان کے حق میں دست بردار ہوگئے تھے، این اے 207کی نشست آصف علی زرداری کے صدر پاکستان منتخب ہونے کے بعد خالی ہوئی تھی۔