خیبر پختونخوا ہ کے گرڈ سٹیشنز پر اراکین اسمبلی کے دھاوے،وزیر توانائی نے وزیر داخلہ سے مدد مانگ لی

اسلام آباد(اردو پوائنٹ اخبارتازہ ترین۔20جون 2024 ) خیبر پختونخوا ہ کے گرڈ سٹیشنز پر اراکین اسمبلی کے دھاوے کے بعد وزیر توانائی اولیس لغاری نے وزیر داخلہ محسن نقوی سے مدد مانگ لی،وفاقی وزیر توانائی نے خیبر پختونخواہ گرڈاسٹیشنز پر پیش آنے والے واقعات پر وفاقی وزیرداخلہ محسن نقوی کو خط لکھ دیا۔وزیرداخلہ محسن نقوی کو لکھے خط میں کہنا تھا کہ خیبر پختونخوا ہ میں ذمہ دار شخصیات گرڈ اسٹیشنز کے احاطے میں مظاہروں کی قیادت کر رہی ہیں۔

ایسے واقعات بجلی بندش پر مردان، چارسدہ، ٹانک، بنوں اور پشاور میں پیش آرہے ہیں۔ یہ صورتحال نہ صرف گرد اسٹیشنز کی سیفٹی بلکہ عملے کی سیفٹی کیلئے بھی خطرے کا باعث ہے۔ عملے کو غیر قانونی احکامات دئیے جارہے ہیں اور پولیس ایف آئی آر درج نہیں کر رہی۔

(جاری ہے)

خط میں کہا گیا کہ صوبائی اراکین اسمبلی اور دیگر نے گرڈ اسٹیشن عملے کو بجلی بحالی سے متعلق غیر قانونی احکامات دئیے۔

ان فیڈرز پر بہت نقصانات اور بجلی چوری ہوتی ہے۔خط میں یہ بھی کہا گیا کہ اس سے قانون کو ہاتھ میں لینے کیلئے دیگر اضلاع کے عوام کی حوصلہ افزائی کی جا رہی ہے۔قانون نافذ کرنے والے اداروں کو گرڈز پر سخت سکیورٹی فراہم کرنے کی ہدایت کی جائے، غیر متعلقہ افراد کو گرڈز میں داخل ہونے سے روکا جائے۔اس کے علاوہ خط کے ساتھ پیسکو چیف کی رپورٹ بھی منسلک کی گئی ہے۔

سی ای او پیسکو کی طرف سے بھیجی گئی ایک رپورٹ شیئر کی جارہی ہے جس میں کہا گیا کہ صوبائی اراکین اسمبلی دیگر اہم شخصیات نے گرڈ اسٹیسنز عملے کو بجلی بحالی سے متعلق غیر قانونی احکامات دئیے۔ ان فیڈرز پر بہت نقصانات اور بجلی چوری ہوتی ہے۔ غیر متعلقہ افراد کو گرڈز میں داخل ہونے سے روکا جائے۔پیسکو کی طرف سے گرڈ اسٹیسنز میں زبردستی گھسنے والے نامزد افراد کے خلاف مقدمے درج کیے جائیں، ان افراد کے خلاف مقدمات درج کئے جائیں جو زبردستی گرڈ اسٹیشنز میں داخل اور بجلی بحال کی۔ وفاقی وصوبائی سطح صوبے کے تمام گرڈز پر سخت سیکیورٹی فراہم کرنے کی ہدایت کی جائے۔