سکیورٹی پر معمور اہلکاروں کی سائیکولوجیکل سکریننگ کا نظام متعارف کروانے کا فیصلہ

اٹک ( اُردو پوائنٹ اخبارتازہ ترین۔ 20 جون 2024ء ) حکومت نے سکیورٹی پر معمور اہلکاروں کی سائیکولوجیکل سکریننگ کا نظام متعارف کروانے کا فیصلہ کرلیا۔ اٹک میں تقریب سے خطاب کرتے ہوئے وفاقی وزیر قانونی اعظم نذیر تارڑ نے کہا کہ اٹک میں پیش آنے والا واقعہ افسوسناک ہے، رشتے نبھانے کا تعلق صرف لفظوں سے نہیں بلکہ عمل سے بھی ہوتا ہے، میں بہت رنجیدہ ہوں اور اس سے زیادہ پریشان ہوں کہ ہمیں سکیورٹی کے اقدامات میں کتنی حد تک اصلاح کی ضرورت ہے، اس بات پر ہمیں غور و خوض کی ضرورت ہے، اسی لیے اس واقعے کے بعد ہم نے وزیراعلیٰ پنجاب سے رابطہ کیا اور ان سے درخواست کی کہ اس کی تفتیش میں رعایت نہیں برتی جانی چاہیے تاکہ یہ غلط فہمی نہ ہو کہ ملزم پولیس کا افسر ہے تو اس کے ساتھ کوئی رعایت برتی جائے گی۔

(جاری ہے)

وفاقی وزیر نے کہا کہ یہ ہمارے لیے ٹیسٹ کیس ہے، انصاف ہوگا اور آپ کو انصاف ہوتا ہوا نظر آئے گا، ڈیوٹی کرتے ہوئے ہمارے بھائیوں کو قتل کیا گیا، اس کا مقصد تھا کہ ایک پیغام دیا جائے کہ وکلا نے مقدمے ہارنے نہیں ہیں تو یہ بدنصیبی ہے اس ذہنیت کی، ہمارے بزرگ کہتے تھے وکیل کا کام اپنا مقدمہ عدالت کے سامنے رکھنا ہے، وہ اس مقدمے کے نتائج کا ذمہ دارر نہیں ہوتا۔

اعظم نذیر تارڑ نے بتایا کہ اس معاملے پر کوئی رعایت نہیں برتی جائے گی، یہ بیہمانہ قسم کے واقعات ہیں اور اس پر حکومت کی سنجیدگی نظر آتی رہے گی، یہ جذباتی باتیں نہیں ہیں، مقتول کے خاندان والوں کی سپورٹ کی بات ہو رہی ہے تو میں یہ کہتا ہوں انسان کا تو کوئی نعم البدل نہیں ہے، وزیراعلیٰ پنجاب نے کہا ہے ہم اس کام کو مل کر کریں گے اور 2 کروڑ روپے تو فوری طور پر دے دیئے جائیں گے۔

ان کا کہنا ہے کہ وکلا کسی بھی معاشرے میں انسانی حقوق اور انصاف کی فراہمی کے حوالے سے اہم طبقہ ہے، ان کا کردار بہت اہم ہے، اس واقعہ کے تدارک کے لیے آئندہ بھی سوچنا چاہیے، جو سکیورٹی پہ معمور اہلکاران ہیں ان کی ایک سائیکولوجیکل اسکریننگ کا نظام متعارف کیا جارہا ہے، جس شخص کے ہاتھ میں ہتھیار ہے اور اس نے ٹریگر دبانا ہے اور اس کی رسائی ہر جگہ ہے تو اس کے بارے میں ہمیں بہت محتاط ہونا چاہیے۔