اسلام آباد میں پولیس مقابلہ، کارلفٹر گینگ کے 3 ملزمان اپنے ساتھیوں کی فائرنگ سے مارے گئے

اسلام آباد (اُردو پوائنٹ اخبارتازہ ترین - اے پی پی۔ 23 جون2024ء) اسلام آباد پولیس کا علی الصبح خطرناک بین الصوبائی کارلفٹر گینگ کے ساتھ مقابلہ ہوا،پولیس مقابلے میں خطرناک کارلفٹرز گینگ کے 3 ملزمان اپنے ساتھیوں کی فائرنگ سے ہلاک ہو گئے۔ ترجمان اسلام آباد پولیس نے کہا ہے کہ اسلام آباد پولیس گزشتہ دوماہ سے اس خطرناک گینگ کے تعاقب میں تھی،سیف سٹی کیمروں اور انسانی ذرائع سے اس گینگ کی معلومات اکٹھی کی گئی تھیں، گینگ کی آمدورفت کے حوالے سے ایک روٹ بنایا گیا تھا،ذرائع نے پولیس کو اطلاع دی تھی کہ یہ گینگ مری کے طرف نکلا ہے۔

انہوں نے کہا کہ اطلاع پر اے وی ایل سی، سی آر ٹی اور اے ٹی ایس کی ٹیموں نے مختلف علاقوں میں خصوصی ناکے قائم کئے،آج صبح کشمیر چوک ناکے پر موجود پولیس ٹیموں نے مری روڈ سے آتی ان کی گاڑیوں کو روکنے کی کوشش کی،ملزمان 2 گاڑیوں میں سوار تھے جن میں ایک جی ایل آئی اور دوسری ہنڈا سوک گاڑی تھی،گاڑیوں میں موجود گینگ ممبران نے اچانک پولیس ٹیموں پر فائرنگ شروع کردی۔

(جاری ہے)

ترجمان اسلام آباد پولیس کے مطابق جی ایل آئی کار سواروں کی فائرنگ سے ان کے اپنے تین ساتھی ملزمان ہلاک ہوگئے،فائرنگ میں ایک عورت بھی زخمی ہوئی جبکہ جی ایل آئی گاڑی سے فائرنگ کرنے والے ملزمان فرار ہوگئے،ڈیڈ باڈیز اور زخمی کو فوری ہسپتال منتقل کیا گیا۔ انہوں نے کہا کہ ڈیڈباڈیز کی شناخت الیاس خان سکنہ چارسدہ، وقاص خان سکنہ چارسدہ ہوئی ہے جبکہ ایک ڈیڈ باڈی کی شناخت جاری ہے جبکہ زخمی عورت کی شناخت حسیبہ امجد کے نام سے ہوئی۔

ہلاک ملزم الیاس خان خطرناک کارلفٹر گینگ کا سرغنہ جبکہ باقی گینگ ممبر ہیں۔ملزمان نے رات کو مری سے گاڑی چوری کی اور فرار ہورہے تھے۔دوسری گاڑی ہنڈا سوک بھی لاہور سے چھینی گئی تھی۔ہنڈا سوک کار سے متعدد غیرنمونہ نمبر پلیٹس، جیمر، موبالئزر، اگنیشن بریکر ، ایس ایم جی گن، پسٹلز برآمد ہوئے ہیں۔ پولیس کی بھاری نفری موقع پر پہنچ گئی اور فرار ملزمان کی گرفتاری کے لئے مختلف ٹیمیں روانہ کردی گئیں۔ ترجمان اسلام آباد پولیس نے کہا کہ ملزمان متعدد مقدمات میں پولیس کو مطلوب تھے۔