پاکستان تحریک انصاف کراچی کی جانب سے عمران خان کی رہائی کے لئے کورنگی ڈیڑھ نمبر پر پرامن احتجاجی ریلی نکالی گئی

کراچی (اُردو پوائنٹ اخبارتازہ ترین - این این آئی۔ 23 جون2024ء) پاکستان تحریک انصاف کراچی کی جانب سے عمران خان کی رہائی کے لئے کورنگی ڈیڑھ نمبر پر پرامن احتجاجی ریلی نکالی گئی۔ ریلی میں پی ٹی آئی سندھ کے صدر حلیم عادل شیخ کراچی کے صدر راجا اظہر، جنرل سیکریٹری ارسلان خالد، سابق ایم این اے فہیم خان، پی ٹی آئی رہنما رضوان نیازی، ولی مغیری، رکن سندھ اسمبلی واجد علی ایڈووکیٹ حارث میوو، یاسر بلوچ،معظم خان، عائشہ رشید، سمیت دیگر پی ٹی آئی رہنمائوں و کارکنان نے شرکت کی۔

ریلی کے شرکا پر پولیس کی بھاری نفری نے پہنچ کر تشدد کا نشانہ بنایا جس کے نتیجے میں پی ٹی آئی کراچی کے صدر راجا اظہر ، ارسلان خالد، ایڈووکیٹ ناصر، معظیم خان سمیت ایک درجن سے زائد رہنما زخمی ہوگئے۔

(جاری ہے)

پولیس کی بھاری نفری نے کارکن کو تشدد کا نشانہ بناتے ہوئے پی ٹی آئی رکن سندھ اسمبلی واجد حسین، کراچی کے جنرل سیکریٹری ارسلان خالد، پی ٹی آئی سندھ کے ایڈیشنل جنرل سیکریٹری رضوان نیازی، حارث میوو، قدیر احمد سمیت دو درجن سے زائد کارکنوں کو گرفتار کرکے نامعلوم مقام پر منتقل کر دیا۔

پی ٹی آئی سندھ کے صدر حلیم عادل شیخ نے ریلی رد عمل دیتے ہوئے کہا پر امن احتجاج کرنا ہر پاکستانی شہری کا قانونی و آئینی حق ہے سندھ میں جمہوریت کے نام پر سویلین ڈکٹیٹرشپ قائم ہے پولیس نے ہماری پر امن ریلی کے شرکا کو بلا جواز تشدد کا نشانہ بنایا ہے جس کی شدید مذمت کرتے ہیں انہوں نے کہا سندھ میں بلاول زرداری کی جمہوری حکومت نہیں ہے۔ انہوں نے کہا پی ٹی آئی کی جانب سے بانی چیئرمین عمران خان کی رہائی کے لئے پر امن احتجاج کیا جارہا تھا عمران خان قوم کیعظیم لیڈر ہیں جن کو جھوٹے کیسز میں پابند سلاسل کیا ہوا ہے۔

انہوں نے کہا پر امن تحریک جاری رہے گی پولیس گردی سے ہمارے کارکنوں کے حوصلے پست نہیں ہوسکے ہیں۔ پی ٹی آئی کراچی کے صدر راجا اظہر نے کہا ہمارا احتجاج پر امن پولیس نے ہمیں تشدد کا نشانہ بنایا ہے ایک تیسری قوت ہمارے احتجاج میں شامل ہوکر نو مئی جیسا واقعہ کروانا چاہتی تھی انہوں نے کہا ہم پر امن ہیں پر امن رہیں گے پولیس نے زیادتی کرتے ہوئے ہمارے کارکنوں کو گرفتار کیا ہے فوری طور پر بلا جواز گرفتار کئے گئے پی ٹی آئی کارکنوں کو رہا کیا جائے۔