آپریشن بارے پارٹی میں کسی کا موقف مختلف نہیں،بیرسٹرگوہر

اسلام آباد(اردو پوائنٹ اخبارتازہ ترین۔24جون 2024 ) پاکستان تحریک انصاف کے رہنماءبیرسٹر گوہر کا کہنا ہے کہ علی امین گنڈاپور سے کوئی بات نہیں ہوئی، آپریشن سے متعلق پارٹی میں کسی کا موقف مختلف نہیں، ہمارا موقف صرف اتنا ہے کہ پہلے معاملہ پارلیمنٹ میں لایا جائے، ہمیں بتایا جائے سیکیورٹی صورت حال کیا ہے کیا تھریٹ ہے۔ سپریم کورٹ کے باہر میڈیا سے گفتگو کرتے ہوئے انہوں نے کہا کہ آج کے اجلاس کااعلامیہ اس لئے جاری نہیں ہوا کہ اسمبلی کارروائی کے باعث کور کمیٹی میٹنگ مکمل نہ ہو سکی،مخصوص نشستیں ہماری پارٹی کا حق ہے، امید ہے ہمارے حق میں فیصلہ ہوگا۔

آرٹیکل 51 کے مطابق کسی پارٹی کو جیتی سیٹوں سے زیادہ سیٹیں نہیں مل سکتیں۔ سیٹیں اس جماعت کو ملنی ہیں جن کا ووٹ ہوگا۔

(جاری ہے)

13 جنوری کو سپریم کورٹ نے ہم سے نشان لے لیا تھا، سپریم کورٹ کے فیصلے کے بعد وہ معاملہ آگے نہیں بڑھا۔ پی ٹی آئی نے اپنے امیدواروں کی لسٹیں الیکشن کمیشن کو دی تھیں۔ امید ہے ہمیں ہماری 77 سیٹیں ملیں گی۔وزیراعلیٰ علی امین گنڈا پورکے آپریشن کافیصلہ ہونے کے سوال پر ان کا کہنا تھا کہ میری اس سلسلے میں علی امین گنڈاپور سے کوئی بات نہیں ہوئی۔

ہمارا مطالبہ صرف یہ ہے کہ ہمیں اصل صورتحال کے متعلق بتایا جائے کہ کیا وجوہات ہیں جن کی بناءپر آپریشن کا فیصلہ کیا گیا ہے۔ مولانا فضل الرحمٰن کو بھی آپریشن سے متعلق تحفظات ہیں۔خیال رہے کہ پاکستان تحریک انصاف کی کور کمیٹی کا اجلاس ہوا جس میں وزیر اعلیٰ خیبرپختونخوا علی امین گنڈاپور نے خصوصی طور پر شرکت کی تھی۔ پاکستان تحریک انصاف کی کور کمیٹی کے ہنگامی اجلاس میں وزیر اعلیٰ خیبرپختونخوا ہ سمیت اہم رہنماو¿ں نے شرکت کی تھی۔ کور کمیٹی کے اجلاس میں ممبران نے آپریشن کی مخالفت کی تھی۔ اس موقع پر وزیر اعلیٰ خیبرپختونخوا نے ایک گھنٹہ سے زائد وقت بریفنگ دی تھی۔ علی امین گنڈاپور نے خیبرپختونخواہ میں دہشتگردی سے متعلق آپریشن پر موقف کمیٹی کے سامنے رکھا تھا۔