شاہین آفریدی کی پانچوں انگلیاں گھی میں، دی ہنڈریڈ نہ کھیلنے کے باوجود لاکھوں روپے ملیں گے

لاہور (اردو پوائنٹ تازہ ترین اخبار۔ 24 جون 2024ء ) پاکستان کے فاسٹ بولر شاہین شاہ آفریدی کو دی ہنڈریڈ لیگ میں کھیلنے سے انکار کے باوجود لاکھوں روپے ملیں گے۔ برطانوی میڈیا کے مطابق سابق ٹی ٹونٹی کپتان شاہین آفریدی کو دی ہنڈریڈ لیگ کی انتظامیہ ٹورنامنٹ نہ کھیلنے کے باوجود 17 لاکھ 61 ہزار سے زائد روپے ادا کرے گی، انہوں نے گلوبل ٹی ٹونٹی لیگ کی خاطر دی ہنڈریڈ لیگ میں کھیلنے سے انکار کیا تھا۔

(جاری ہے)

24 سالہ شاہین آفریدی کو 5 ہزار پاؤنڈ امیج رائٹس کی مد میں ملیں گے، ٹورنامنٹ میں سائن کرنے والے کھلاڑیوں کو امیج رائٹس کے بدلے ان کے کنٹریکٹ کا 5 فیصد ملتا ہے۔ برطانوی میڈیا کا کہنا ہے کہ دی ہنڈریڈ لیگ میں ویلش فائر نے شاہین آفریدی کو ایک لاکھ پاؤنڈ میں برقرار رکھا تھا، ویلش فائر نے میٹ ہینری کو شاہین کے متبادل کےطور پر شامل کر لیا تھا۔ نیوزی لینڈ کے فاسٹ بولر میٹ ہینری کو شاہین کے جانے کے بعد امیج رائٹس کے پیسے نہیں ملیں گے۔