راولپنڈی اور اٹک میں قومی و صوبائی اسمبلی کی6حلقوں کے انتخابی نتائج کے خلاف دائر الگ الگ عذر داریاں سماعت کیلئے منظور

پیر 24 جون 2024 22:23

راولپنڈی (اُردو پوائنٹ اخبارتازہ ترین - آن لائن۔ 24 جون2024ء) لاہور ہائی کورٹ راولپنڈی بنچ کے جسٹس وقاص رؤف مرزا پر مشتمل الیکشن ٹریبونل نے راولپنڈی اور اٹک میں قومی و صوبائی اسمبلی کی6حلقوں کے انتخابی نتائج کے خلاف دائر الگ الگ عذر داریاں سماعت کے لئے منظور کرلی ہیں اور فریقین کو نوٹس جاری کرتے ہوئے یکم جولائی کو طلب کر لیا عدالت میں یہ عذر داریاں این اے 49 سے میجر (ر)طاہر صادق، این اے 50 سے ایمن طاہر،این اے 57 سے سمابیہ طاہر جبکہ صوبائی حلقہ پی پی 7 سے شبیر اعوان اورپی پی 15 سے زیاد خلیق کیانی نے دائر کی تھیں این اے 57 سے تحریک انصاف کی حمایت یافتہ امیدوار سمابیہ طاہر نے اپنے وکیل ایڈووکیٹ محمد فیصل ملک کے ہمراہ عدالت میں دائر انتخابی عذر داری میں موقف اختیار کیا تھا کہ ہم ان اے 57 سے 51 ہزار ووٹوں کی برتری سے جیتے ہوئے ہیں لیکن نتائج میں دھاندلی کرکے تبدیل کیا گیاکیونکہ فارم 45کے مطابق درخواست گزار واضح اکثریت سے کامیابی حاصل کر چکی تھی لیکن بعد ازاں یکدم فارم47کے ذریعے نتائج تبدیل کر دیئے گئے اور مد مقابل امیدوار بیرسٹر دانیال چوہدری کو کامیاب قرار دے دیا گیادرخواست میں عدالت سے استدعا کی گئی کہ این اے 57 کے نتائج کو کالعدم قرار دے دیا جائے اور فارم45کے مطابق انتخابی نتائج بحال کئے جائیں اسی طرح دیگر درخواست گزاروں نے بھی عذر داریوں پر دلائل دیئے عدالت نے ابتدائی سماعت کے بعد تمام عذر داریاں سماعت کے لئے منظور کر لی ہیں اور فریقین کو نوٹس جاری کرتے ہوئے یکم جولائی کو طلب کر لیا ہے۔