قومی ٹیم کی ناقص کارکردگی پر الزامات لگانے والے یوٹیوبرز کی شامت آگئی

لاہور (اردو پوائنٹ تازہ ترین اخبار۔ 25 جون 2024ء ) ٹی ٹونٹی ورلڈ کپ میں ٹیم پاکستان کی ناقص کارکردگی پرالزامات لگانے والے ٹیوبرزکےخلاف ایکشن کی تیاریاں مکمل کر لی گئیں۔ نجی ٹی وی آج نیوز کے مطابق پی سی بی کا چند روزمیں ایک درجن سے زائد یوٹیوبرزکے خلاف لیگل ایکشن لینے کا امکان ہے۔ یوٹیوبرز نے بھارت اور امریکا سے شکست کے بعد قومی ٹیم پر میچ فکسنگ کے الزامات عائد کئے تھے۔

ذرائع کے مطابق پی سی بی نے یو ٹیوبرز کے مبینہ الزامات کا ڈیٹا اکٹھا کرلیا ہے اور اب یوٹیوبرز کے خلاف لیگل ایکشن کی تیاریاں ہیں ۔ واضح رہے کہ اس سے قبل قومی وائٹ بال ٹیم کے کپتان بابر اعظم نے معروف ٹی وی اینکر کی جانب سے ٹی20 ورلڈکپ میں تحائف لے کر میچز کے نتائج تبدیل کرنے کے الزامات پر ان کیخلاف ہتک عزت کا دعوی دائر کرنیکا فیصلہ کیا ہے۔

(جاری ہے)

میڈیا رپورٹ کے مطابق معروف ٹی اینکر نے امریکا اور ویسٹ انڈیز میں ہونے والے ٹی20 ورلڈکپ کے دوران پاکستان کرکٹ ٹیم کے کپتان بابراعظم پر تحائف لے کر میچز کے نتائج تبدیل کرنے کا الزام عائد کیا تھا۔ اس حوالے سے اینکرپرسن نے اپنی ویڈیو میں الزام عائد کیا گیا تھا کہ بابر اعظم نے میچز کے نتائج تبدیل کرنے کے لیے مہنگی گاڑیاں، دبئی اور آسٹریلیا میں اپارٹمنٹس حاصل کیے، جب کہ ان پر بکیز سے روابط کا الزام بھی عائد کیا گیا، جس میں ان کے ساتھ دیگر کھلاڑیوں اور کچھ سابق کرکٹرز کا نام بھی لیا تھا۔

اینکرپرسن نے خصوصی طور پر ٹی20 ورلڈکپ میں میزبان امریکا کے خلاف پاکستان کے افتتاحی میچ پر شکوک شبہات کا اظہار کیا گیا تھا، جس میں پاکستان کو سپر اوور میں شکست ہوئی تھی۔بابراعظم نے اینکرپرسن کے خلاف کارروائی کے لیے اپنے وکلا سے قانونی مشاورت مکمل کرلی اور اینکر کے خلاف ہتک عزت کا دعوی دائر کرنے کا فیصلہ کیا ہے۔ذرائع نے بتایا کہ بابراعظم کی جانب سے اینکرپرسن سے معافی کا مطالبہ کیا جائے گا، معافی نہ مانگنے کی صورت میں انہیں عدالت لے جایا جائے گا۔