ٹی ٹونٹی ورلڈ کپ کی تاریخ میں پہلی مرتبہ دو ناقابل شکست ٹیمیں فائنل میں ٹکرائیں گی

لاہور (اردو پوائنٹ تازہ ترین اخبار۔ 28 جون 2024ء ) ٹی ٹونٹی ورلڈ کپ کی تاریخ میں پہلی مرتبہ ایونٹ کی دو ناقابل شکست ٹیمیں مد مقابل ہوں گی۔ ٹی ٹونٹی ورلڈ کپ 2024ء کا فائنل کوالیفائی کرنے والی جنوبی افریقا اور بھارت کی ٹیمیں ایونٹ میں میں کوئی میچ نہیں ہاری ہیں۔ ٹی ٹونٹی ورلڈ کپ 2024ء کے فائنل میں کامیاب ہونے کے بعد، ناقابل شکست رہتے ہوئے دوسری ناقابل شکست ٹیم کو ہرا کر ٹورنامنٹ جیتنے والی دنیا کی پہلی ٹیم بن جائے گی۔

جنوبی افریقا اور بھارت کے درمیان مجموعی ورلڈ کپ مقابلوں میں 1979ء کے بعد پہلی مرتبہ دو ناقابل شکست ٹیموں کا فائنل میں مقابلہ ہوگا۔ 1979ء کے ون ڈے ورلڈ کپ میں انگلینڈ اور ویسٹ انڈیز کی ٹیمیں فائنل سے پہلے کوئی میچ نہیں ہاری تھیں جبکہ ویسٹ انڈیز نے سر کلائیو لائیڈ کی قیادت میں 1975ء اور 1979ء کا ون ڈے ورلڈ کپ ناقابل شکست رہتے ہوئے جیتا تھا۔

(جاری ہے)

2003ء اور 2007ء کی ون ڈے ورلڈ کپ کی فاتح ٹیم آسٹریلیا بھی ٹورنامنٹ میں ناقابل شکست رہی جب کہ 1996ء میں سری لنکا کی ٹیم دو واک اوور سمیت پورے ٹورنامنٹ میں ناقابل شکست رہی تھی۔ 2002ء کی آئی سی سی چیمپئنز ٹرافی کا فائنل ناقابل شکست ٹیموں انڈیا اور سری لنکا کے درمیان ہوا تھا۔