پیرس اولمپکس کا کائونٹ ڈائون شروع، گیمز کے آغا میں 28دن باقی، تیاریاں عروج پر پہنچ گئیں

پیرس(اُردو پوائنٹ اخبارتازہ ترین - این این آئی۔ 28 جون2024ء) پیرس اولمپکس گیمز 26 جولائی سے فرانس کے دارالحکومت پیرس میں شروع ہوں گی جو 11 اگست تک جاری رہیں گی۔ پیرس اولمپکس گیمز کا کائونٹ ڈائون جاری ہے ،کھیلوں کے بڑے میلے کو سجنے میں 28 دن باقی رہ گئے ہیں۔ فرانسیسی دارالحکومت اپنی تاریخ میں تیسری بار دنیا کے سب سے بڑے کھیلوں کے ایونٹ کے کامیاب انعقاد کے لیے مصروف ہے۔

افتتاحی تقریب میں تقریبا ایک ماہ باقی رہ گیا ہے،پیرس اولمپکس گیمز کی انتظامیہ کے مطابق کھیلوں کے سب سے بڑے میلے کو سجانے کے لئے بھرپور تیاریاں اپنے آخری مراحل میں ہیں۔ پیرس اولمپکس گیمز میں32 کھیلوں کی329 ایونٹس ہوں گے جن میں دنیا بھر سے تقریبا ساڑھی10 ہزار اتھلیٹس شرکت کریں گے۔ پیرس اولمپکس 2024 کی آرگنائزنگ کمیٹی آنے والے دنوں اور ہفتوں کے دوران تیاریوں کے عمل کو مزید تیز کرے گی، اہم سہولیات اور مقامات میں مین پریس سنٹر، انٹرنیشنل براڈکاسٹ سنٹر اور اولمپک ولیج شامل ہیں جس میں 14000 سے زیادہ رہائشیوں کی جگہ بنائی جائے گی جن میں اتھلیٹس، کوچز، معاون عملہ اور اہلکار رہیں گے جبکہ دیگر مقامات کو بھی پایہ تکمیل تک پہنچایا جا رہا ہے۔

(جاری ہے)

پیرس اولمپکس 2024 کی آرگنائزنگ کمیٹی کے مین آپریشن سینٹرنے رواں سال اپریل کے وسط سے ہی کام شروع کر دیا تھا ۔پیرس کے اہم مقامات جیسے کنکورڈ اور ٹروکاڈرو پبلک اسکوائرز، انویلائیڈز یادگار اور ایفل ٹاور پر عارضی سہولیات کی تعمیر مکمل ہونے کے قریب ہے۔ ان کاموں میں باسکٹ بال، سکیٹ بورڈنگ،بی ایم ایکس اور بریک ڈانسنگ جیسے ایونٹس کے لیے 37,000 تماشائیوں کی گنجائش کے لیے عارضی گرانڈ سٹینڈز شامل ہیں۔

حکام نے شہر کے بڑے حصوں کو پیدل چلنے والوں کے لیے دوستانہ بنانے کے لیے بنائے گئے ٹریفک کے راستے بھی بنائے ہیں۔مقابلوں کی جگہ پر کوالیفائنگ شیڈول کا 80فیصد سے زیادہ کام مکمل ہو چکا ہے جو 8000 سے زیادہ اتھلیٹس کی نمائندگی کر ے گا۔ کھیلوں کے میگا ایونٹ کے بقیہ سلاٹس کی تصدیق جون کے آخر تک ہو جائے گی اور قومی کمیٹیوں کے پاس اپنے کھلاڑیوں کو رجسٹر کرانے کے لیے 8 جولائی تک کا وقت ہے۔

پیرس اولمپکس 2024 کے لیے اب تک 80 لاکھ سے زیادہ ٹکٹس فروخت ہو چکے ہیں جو پہلے ہی اس بات کو یقینی بنا رہے ہیں کہ یہ اب تک کے بہترین کھیلوں میں سے ایک ہو گا۔آرگنائزنگ کمیٹی کے مطابق ڈرون حملوں جیسے ممکنہ خطرات کے خدشات کے باعث فرانسیسی حکومت نے اولمپک کی افتتاحی تقریب کے لیے تماشائیوں کی تعداد کو آدھا کر دیا ہے،تاہم صدر ایمانویل میکرون نے عندیہ دیا ہے کہ اگر سکیورٹی خطرات بڑھتے ہیں تو تقریب کو ایک بند سٹیڈیم میں منتقل کیا جا سکتا ہے۔

حفاظت کو یقینی بنانے کے لیے حکومت تقریبا 20,000 فوجیوں اور 40,000 سے زیادہ پولیس افسران کو تعینات کر رہی ہے جن میں دوسرے ممالک کے 2,000 فوجیوں اور پولیس افسران کی اضافی مدد حاصل ہوگی ۔پیرس پولیس کے سربراہ لارینٹ نونیز کا کہنا ہے کہ گیمز کے دوران تقریبا 30,000 پولیس افسران اور مسلح افواج کے 18,000 سپاہی روزانہ متحرک ہوں گے۔منتظمین نے یقین دہانی کرائی ہے کہ حفاظتی اقدامات شرکااور تماشائیوں کی حفاظت کی ضمانت دیں گے۔واضح رہے کہ پیرس اولمپکس گیمز 11اگست کو اختتام پذیر ہوں گے۔