اسرائیل کی زمینی افواج اور حزب اللہ آمنے سامنے‘آپریشن کے دوران آٹھ فوجی ہلاک ہوئے ہیں.اسرائیلی فوج کا اعتراف

بغداد/بیروت(اردوپوائنٹ اخبارتازہ ترین-انٹرنیشنل پریس ایجنسی۔03 اکتوبر ۔2024 ) عرب لیگ کونسل کے مستقل نمائندوں کا ہنگامی اجلاس جمعرات کو طلب کرلیا گیا ہے جس میں اسرائیل کی زمینی کارروائی کی روشنی میں لبنان کی حمایت پر مشاورت کی جائے گی یہ اجلاس عراق کی درخواست پر طلب کیا گیا ہے جہاں لبنان میں خوراک اور طبی امداد پہنچانے کے بارے میں بات چیت ہوگی.

(جاری ہے)

اسرائیل نے لبنان میں پناہ گزین کو متنبہ کیا ہے کہ وہ ابھی اپنے علاقوں میں واپس نہیں جاسکتے اسرائیلی فوج کے ترجمان نے کہا کہ مخصوص علاقوں میں کارروائیاں جاری ہیںادھر لبنان کے جنوبی علاقوں میں حزب اللہ کے جنگجوﺅں اور اسرائیلی افواج کے درمیان آنے سامنے لڑائی شروع ہوگئی ہے اسرائیلی فوج کے مطابق لبنان کے جنوبی علاقوں میں جنگی طیاروں نے فوجیوں کی معاونت کی اس کے مطابق جھڑپوں کے دوران حزب اللہ کے دوجنگجو ہلاک ہوئے ہیں اور تنظیم کے انفراسٹرکچر کو تباہ کیا گیا اسرائیلی فوج کا کہنا ہے کہ اس آپریشن کے دوران اس کے آٹھ فوجی ہلاک ہوئے ہیں ان میں سے اکثر ایگوز اور گولانی بریگیڈ کے کمانڈوز تھے.

حزب اللہ کا کہنا ہے کہ اس کے جنگجوﺅں نے اسرائیلی کمانڈوز پر اینٹی ٹینک میزائلوں سے حملہ کیا اور جھڑپوں میں درجنوں اسرائیلی فوجی ہلاک اور زخمی ہوئے ہیں حزب اللہ کا کہنا ہے کہ اسرائیلی فوجیوں کو کفرکلا کے گرد و نواح میں دھماکوں اور فائرنگ کا نشانہ بنایا گیا جبکہ مارون الراس میں تین اسرائیلی مرکاوا ٹینک تباہ کیے گئے. عسکری ماہرین کا کہنا ہے کہ حزب االلہ نے جنوبی لبنان میں کئی برسوں تک انفراسٹرکچر تعمیر کیا ہے جس میں زیرزمین سرنگوں کا جال بھی شامل ہے ایسے حالات میں حزب اللہ گوریلا کاروائیوں کو ترجیح دے گی کیونکہ اس کے پاس ایسی جنگ کے لیے ہزاروں تربیت یافتہ جنگجو ہیں اور وہ علاقے کو بخوبی جانتے ہیں انہوں نے کہا کہ گوریلا جنگ اسرائیل کے لیے ایک دلدل ثابت ہوسکتی ہے جس سے نکلنے کے لیے بھاری نقصان کے ساتھ اسے بہت وقت بھی لگے گا.

ماہرین کا کہنا ہے کہ جنوبی لبنان کا بیشتر علاقہ پہاڑی سلسلوں پر مشتمل ہے لہذا اسرائیل کو فضائی سپورٹ کا استعمال بڑی احتیاط سے کرنا پڑے گا کیونکہ اس کی اپنی زمینی افواج بھی وہاں موجود ہیں جبکہ حزب اللہ جیسے گروپ کھلی جنگوں میں بڑی فوجی طاقتوں کا مقابلہ نہیں کرسکتے لہذا ان کی مہارت گوریلا جنگ میں ہوتی ہے اور یہ چھوٹی ٹولیوں میں اچانک چھاپہ مار کاروائیاں کرتے ہیں تو خیال کافی حد درست ہے کہ اسرائیل آخرکار حزب اللہ کے ٹریپ میں آگیا ہے جس کے لیے حزب اللہ نے بہت قربانیاں دی ہیں .

ادھر اسرائیل نے اپنے اعلانات کے برعکس لبنان کے دارالحکومت بیروت کے مرکزی علاقے میں پارلیمنٹ سے محض کچھ میٹر فاصلے پر ایک عمارت پر فضائی حملہ کیا ہے جس میں پانچ افراد ہلاک اور متعدد زخمی ہوئے ہیں لبنانی حکام کا کہنا ہے کہ اسرائیل کے فضائی حملے میں مرکزی بیروت کی ایک عمارت کو نشانہ بنایا گیا جس میں پانچ افراد ہلاک ہوئے اسرائیلی فوج کا کہنا ہے کہ اس عمارت میں حزب اللہ سے منسلک ایک طبی مرکز قائم تھا.

اسرائیل کا بیروت کے مرکز میں یہ پہلا حملہ ہے اس کا ہدف لبنان کے پارلیمنٹ سے صرف کچھ میٹر کے فاصلے پر ہے اسرائیل نے پانچ دیگر فضائی حملے بھی کیے جن میں ضاحیہ میں اہداف کو نشانہ بنایا گیا حزب اللہ کا دعوی ہے کہ اس نے جنوبی لبنان میں اسرائیلی فوجیوں سے جھڑپوں کے دوران اسرائیل کے ٹینک تباہ کیے ہیں تنظیم نے اپنے جنگجوﺅں کی مدد سے اسرائیلی فوج کے خلاف مزاحمت جاری رکھنے کا اعلان کیا ہے.

اسرائیلی فوج کے مطابق زمینی کارروائی کے لیے اضافی دستے اور اسلحہ پہنچ چکا ہے جس کی مدد سے لبنان میں سرحد کے قریب قائم انفراسٹرکچر تباہ کیا جائے گا لبنان کی وزارت صحت کے مطابق گذشتہ 24 گھنٹوں کے دوران اسرائیلی بمباری میں 46 افراد ہلاک اور 85 زخمی ہوئے ہیں اطلاعات کے مطابق ہلاک ہونے والوں میںامریکی ریاست مشی گن سے تعلق رکھنے والے ایک امریکی مستقل رہائشی بھی شامل ہیں.