پی ٹی آئی نے بار بار ثابت کیا ہے کہ ان کے فیصلے ملک دشمن ہیں، سعید غنی

ہفتہ 5 اکتوبر 2024 21:49

کراچی (اُردو پوائنٹ اخبارتازہ ترین - آن لائن۔ 05 اکتوبر2024ء) وزیر بلدیات سندھ سعید غنی نے کہا ہے کہ پی ٹی آئی نے بار بار ثابت کیا ہے کہ ان کے فیصلے ملک دشمن ہیں۔ سیاسی اختلافات ہوسکتے ہیں لیکن ملک کے لئے ایک ہونا چاہیے۔ شہر میں بارشوں کے بعد متاثرہ انفراسٹرکچر پر کام کا آغاز کردیا گیا ہے اور آئندہ دو ماہ میں مکمل کرلیا جایے گا۔ ان خیالات کا اظہار انہوں نے ہفتہ کے روز میڈیا سے بات چیت کرتے ہوئے کیا۔

سعید غنی نے کہا کہ بانی پی ٹی آئی اپنی سیاست سے دیگر ممالک کو فائدہ پہنچا رہے ہیں۔ انہوں نے کہا کہ پرامن احتجاج سب سیاسی جماعتوں کا حق ہے لیکن پی ٹی آئی نے ہمیشہ وہ وقت چنا ہے جب اس ملک میں غیر ملکی سربراہان کانفرنس میں شرکت کے لئے آرہے ہیں۔ انہوں نے کہا کہ اس سے قبل بھی دھرنے کے باعث چینی صدر کا دورہ پاکستان منسوخ ہوا ہے۔

(جاری ہے)

ایک سوال کے جواب میں سعید غنی نے کہا کہ بارشوں کے بعد شہر کے انفراسٹرکچر کو درست کرنے پر کام کا آغاز کردیا ہے اور اس کے لئے سندھ حکومت نے ڈیڑھ ارب روپے جاری کردیئے ہیں اور وزیر اعلٰی سندھ مزید ٹاؤنز میں انفراسٹرکچر کی بحالی کے لئے بھی پیسہ جاری کریں گے۔

انہوں نے کہا کہ آئندہ دو ماہ کے دوران تمام سڑکوں کو درست کردیا جائے گا۔ سعید غنی نے کہا کہ ہمارے مخالفین تمام سڑکوں کے بن جانے کے بعد بھی تنقید کرتے رہیں گے۔ ہمیں ان کی تنقید کا کوئی اشیو نہیں، ہم شہر کے انفراسٹرکچر کو یہاں کے عوام کے لئے ٹھیک کررہے ہیں اور ہم عوام کے ساتھ کھڑے ہیں۔ #