کوئی چیز پرفیکٹ نہیں ہوتی، آئینی ترمیم بھی پرفیکٹ نہیں ہوگی ،شیری رحمان

ہفتہ 12 اکتوبر 2024 22:29

اسلام آباد(اُردو پوائنٹ اخبارتازہ ترین - آن لائن۔ 12 اکتوبر2024ء) پیپلزپارٹی کی مرکزی رہنما سینیٹر شیری رحمان نے کہا ہے کہ پیپلز پارٹی قومی سلامتی پالیسی پر بھی اتفاق رائے پیدا کرتی ہے ‘اتفاق رائے پیدا کرنا پاکستان پیپلز پارٹی کی خصوصیت ہے ‘کوئی چیز پرفیکٹ نہیں ہوتی، آئینی ترمیم بھی پرفیکٹ نہیں ہو گی ۔ خصوصی کمیٹی اجلاس کے بعد صحافیوں سے گفتگو کرتے ہوئے شیری رحمان نے کہا کہ ہم آہنگی پیدا کرنے کی کوشش کر رہے ہیں ‘کمیٹی کا اجلاس ان کیمرہ ہے ۔

انہوں نے کہا کہ قائد اعظم محمد علی جناح نے بھی آئینی عدالت کو ترجیح سمجھا ‘یہ آئینی ترمیم عدالت پر حملہ ہر گز نہیں ہے‘ ججز کی تعیناتی پر مختلف ممالک میں مختلف طریقہ کار ہیں ‘کہیں ایسا نہیں کہ سینیارٹی کی بنیادوں پر ججز تعینات ہوں ‘سینیارٹی کی بنیادوں پر تعیناتیوں سے ڈیم فنڈز ہی بنے ہیں۔

(جاری ہے)

انہوں نے کہا کہ پیپلز پارٹی واحد جماعت ہے جس نے آئینی ترمیمی ڈرافٹ جمع کرایا ہے‘پیپلز پارٹی قومی سلامتی پالیسی پر بھی اتفاق رائے پیدا کرتی ہے ‘اتفاق رائے پیدا کرنا پیپلز پارٹی کی خصوصیت ہے ‘سیاست میں باہمی مفادات کی بنیاد پر بات ہوتی ہے ‘کوئی چیز پرفیکٹ نہیں ہوتی، آئینی ترمیم بھی پرفیکٹ نہیں ہو گی ۔

شیری رحمان نے کہا کہ آئینی ترمیم میں شفافیت لانے کی کوشش کی جا رہی ہے ۔اس موقع پر سینیٹر کامران مرتضیٰ نے صحافیوںکو بتایا کہ جمعیت علمائے اسلام ف نے بھی اپنا ڈرافٹ جمع کرایا ہے۔