موسمی خرابی سے فلائٹ آپریشن بھی شدید متاثر، 5 پروازیں منسوخ، 55 میں تاخیر

ہفتہ 16 نومبر 2024 15:11

لاہور(اُردو پوائنٹ اخبارتازہ ترین - این این آئی۔ 16 نومبر2024ء) پنجاب میں اسموگ اور شدید دھند کی وجہ سے مختلف ائیرپورٹس کا فلائٹ آپریشن متاثر ہونے کی وجہ سے 5 پروازیں منسوخ، 4 کو متبادل ائیرپورٹس پر لینڈ کرایا گیا اور 55 پروازیں تاخیر کا شکار ہوئیں۔ایوی ایشن ذرائع کے مطابق موسمی خرابی سے سیالکوٹ کا فلائٹ آپریشن زیادہ متاثر ہے جہاں 3 غیرملکی پروازیں لینڈ نہ کر سکیں اور انہیں متبادل ائیرپورٹس پر اتارا گیا۔

شارجہ سے سیالکوٹ پہنچی پرواز کو اسلام آباد لینڈ کرایا گیا، سیالکوٹ سے شارجہ واپسی کی پرواز منسوخ کر دی گئی اور مسقط سے سیالکوٹ کی پرواز لاہور اتاری گئی۔ایوی ایشن ذرائع نے بتایا کہ مسقط سے سیالکوٹ پہنچی پرواز پی ایف 737 کو بھی لاہور لینڈ کرایا گیا، جدہ سے 12 گھنٹے تاخیر سے لاہور روانہ ہوئی پرواز پی اے 471 کی اسلام آباد لینڈنگ ہوئی، کراچی اسلام آباد کی 5 پروازوں میں تاخیر ہوئی جبکہ لاہور کراچی کی 3 پروازوں میں 2 سے 5 گھنٹے تاخیر ہوئی۔

(جاری ہے)

فلائٹ شیڈول کے مطابق دبئی، استنبول، جدہ اور مدینہ سے کراچی کی پروازوں کی آمد و روانگی میں بھی تاخیر ہوئی، اسلام آباد ائیرپورٹ کی دبئی، دمام، شارجہ، القسیم، جدہ، دوحا اور کویت کی پروازوں میں تاخیر ہے۔اس کے علاوہ اسلام آباد سے ابو ظہبی، گلگت اور مسقط کی پروازوں کی روانگی میں بھی تاخیر رپورٹ ہوئی ہے، لاہور سے کوئٹہ، دمام، استنبول، القسیم اور دبئی کی پروازوں جبکہ پشاور سے شارجہ، ابوظہبی، دبئی اور مسقط کی پروازوں کی آمد و روانگی میں تاخیر ہوئی۔

ذرائع کے مطابق سیالکوٹ سے دبئی کی 2 پروازوں کی آمد اور روانگی میں تاخیر ہے، شارجہ سے فیصل آباد کی غیر ملکی ائیر لائن کی پروازوں کی آمد و روانگی میں 12 گھنٹے تاخیر ہوئی جبکہ ملتان سے دبئی کراچی کی پروازوں کی آمد روانگی میں بھی تاخیر ہوئی۔