Live Updates

پی ٹی آئی کے مطالبات بے تکے ہیں، حکومت کوئی مذاکرات نہیں کر رہی، سینیٹر عرفان صدیقی

منگل 19 نومبر 2024 20:10

اسلام آباد (اُردو پوائنٹ اخبارتازہ ترین - اے پی پی۔ 19 نومبر2024ء) سینیٹ میں پاکستان مسلم لیگ (ن) کے پارلیمانی لیڈر اور خارجہ امور کی قائمہ کمیٹی کے سربراہ سینیٹر عرفان صدیقی نے کہا ہے کہ پی ٹی آئی کے چار مطالبات خیالی غبارے ہیں، ان پر حکومت کسی طرح کے کوئی مذاکرات نہیں کر رہی نہ پی ٹی آئی کو اس سلسلے میں کوئی رعایت دی جا سکتی ہے، یہ چاروں مطالبات نان سارٹر ہیں، پی ٹی آئی 24 نومبر کو احتجاج کا اعلان کرکے بند گلی میں آ چکی ہے، وہ اس سے نکلنے کے لئے کسی بہانے کی تلاش میں ہے، خود پی ٹی آئی کے سینئر راہنما رسوائی سے بچنے کے لئے ہاتھ پائوں مار رہے ہیں، انہیں سنجیدہ مذاکرات کا نام نہیں دیا جا سکتا۔

ایک نجی ٹیلی ویژن سے گفتگو کرتے ہوئے انہوں نے کہاکہ عمران خان نے اپنی حکومت کے دوران غداری، ایفی ڈرین، ہیروئن اور کرایہ داری جیسے جھوٹے اور مضحکہ خیز مقدمات بنا کر اپوزیشن کو جیلوں میں ڈالا، ہم نے ایسا ہرگز نہیں کیا، عمران خان اور ان کے تمام ساتھیوں پر ٹھوس مقدمات ہیں۔

(جاری ہے)

اس سوال کے جواب میں کہ کیا نوازشریف عمران خان کو جیل میں دیکھنا چاہتے ہیں؟ سینیٹر عرفان صدیقی نے کہا کہ نواز شریف اس نوع کے سیاستدان نہیں، انہوں نے تو لندن سے آتے ہی ماضی کو بھلا دینے کی بات کی تھی، عمران خان اپنے سنگین جرائم کی وجہ سے جیل میں ہیں اور مقدمات بھگت رہے ہیں، کیا توشہ خانہ کی گھڑیاں اور زیورات نواز شریف نے دبئی کے بازاروں میں بیچنے کے لئے کہا تھا؟ کیا 190 ملین پائونڈ کے عوض زمین ہتھیانے اور نام نہاد القادر ٹرسٹ بنانے کے لئے نواز شریف نے کہا تھا؟ کیا اڑھائی سو فوجی تنصیبات پر حملے نواز شریف نے کرائے تھے؟سینیٹر عرفان صدیقی نے کہا کہ اگر کوئی معقول مطالبات ہیں تو آئیں بات کریں لیکن 26 ویں ترمیم ختم کرنے، مینڈیٹ واپس کرنے، مقدمات ختم کرنے اور تمام قیدیوں کو رہا کر دینے جیسے بے تکے مطالبات پر بات نہیں ہو سکتی۔

انہوں نے کہا کہ 2018 کے انتخابات میں دھاندلی کا اقرار تو جنرل باجوہ کر چکے ہیں، انہوں نے مولانا فضل الرحمن سے کہا تھا کہ ”ہاں ہم نے عمران خان کو جتانا تھا لیکن مصالحہ کچھ زیادہ لگ گیا۔“ سینیٹر عرفان صدیقی نے کہا کہ پی ٹی آئی 24 نومبر کی کال واپس لے لے تو اچھا ہے ورنہ حکومت آئین و قانون کے تحت عوام کی جان و مال کے تحفظ کے لئے اپنا فرض ادا کرے گی۔