دشمن پر لرزہ طاری کرنیوالے میجر شبیر شریف کا 53 واں یوم شہادت عقیدت واحترام سے منایا گیا

جمعہ 6 دسمبر 2024 21:43

لاہور (اُردو پوائنٹ اخبارتازہ ترین - آن لائن۔ 06 دسمبر2024ء) دشمن پر لرزہ طاری کرنے والے میجر شبیر شریف کا 53 واں یوم شہادت جمعہ کے روز انتہائی عقیدت واحترام سے منایا گیا ۔میجر شبیر شریف شہید 28 اپریل 1947 کو ضلع گجرات کے قصبہ کنجاہ میں پیدا ہوئے، 1964 میں 21 سال کی عمرمیں پاک فوج میں شمولیت اختیار کی، میجر شبیر شریف شہید سابق چیف آف آرمی سٹاف جنرل راحیل شریف کے بڑے بھائی اور میجر عزیز بھٹی شہید نشانِ حیدر کے بھانجے تھے۔

(جاری ہے)

میجر شبیر شریف شہید 1965 کی جنگ میں بحیثیت سیکنڈ لیفٹیننٹ شریک ہوئے اور بہادری سے دشمن کا مقابلہ کیا جس پر انہیں ستارہ جرات سے نوازا گیا، 1971 کی پاک بھارت جنگ میں بھی یہی عزم اور حوصلہ کام آیا اور ہیڈ سلیمانکی کے مقام پر میجر شبیر شریف کی کمان میں سکس ایف ایف رجمنٹ نے دشمن کی فوج کو تہس نہس کر ڈالا۔ آئی ایس پی آر کے مطابق قوم کے بہادر سپوت نے 6 دسمبر 1971 کو جام شہادت نوش کیا، میجر شبیر شریف واحد شخصیت ہیں جنہیں نشانِ حیدر اور ستارہ جرأت سے نوازا گیا۔