2024 میں انسانی سمگلنگ پر 3456مقدمات ،1638ملزمان گرفتار ہوئے، وزیر قانون

یونان کشتی حادثے پر 38ایف آئی اے افسران کو نوکریوں سے برخاست کیا گیا، قومی اسمبلی میں اظہار خیال

پیر 13 جنوری 2025 21:25

اسلام آباد (اُردو پوائنٹ اخبارتازہ ترین - این این آئی۔ 13 جنوری2025ء)وفاقی وزیر قانون و انصاف اعظم نذیر تارڑ نے کہا ہے کہ انسانی اسمگلنگ کیخلاف جنگی بنیادوں پر اقدامات کر رہے ہیں ،2024 ء میں 3ہزار 456مقدمات درج اور ایک ہزار 638ملزمان گرفتار ہوئے ہیں۔

(جاری ہے)

پیر کے روز ڈپٹی سپیکر غلام مصطفی شاہ کی زیر صدارت قومی اسمبلی کا اجلاس ہوا اس دوران انسانی سمگلنگ کیخلاف مناسب اقدامات نہ ہونے پر توجہ دلا نوٹس پیش کیا گیا جس پر وفاقی وزیر قانون و انصاف اعظم نذیر تارڑ نے کہا کہ دسمبر 2024ء میں انسانی سمگلنگ کے حوالے سے 42واقعات ہوئے ،تحقیقات کے دوران ایف آئی اے کے افسران کیخلاف بھی کارروائیاں کی گئیں۔

اعظم نذیر تارڑ نے کہا کہ 15ماسٹر مائنڈز کو گرفتار کیا گیا اور 68.81ملین مالیت کے اثاثے منجمد کئے گئے ہیں، یونان کشتی حادثے پر 38ایف آئی اے افسران کو نوکریوں سے برخاست کیا گیا۔انہوں نے بتایا کہ سزائوں کو بڑھا کر ناقابل ضمانت کی کیٹیگری میں ڈال دیا گیا ہے ،اب صرف نوٹیفائیڈ ججز ان کیسز کو سنیں گے۔ انہوں نے کہا کہ وزیراعظم شہباز شریف معاملے پر ہفتہ وار بریفنگ لے رہے ہیں، اس حوالے سے ایک بل لائیں گے ،امید ہے آپ ساتھ دیں گے۔