Live Updates

مخصوص طبقہ مذموم پراپیگنڈہ کر رہا ہے، جعلی کیسزمیں سزاؤں سے عمران خان کو عوام کے دلوں سے نہیں نکالا جا سکتا ، مسرت جمشید چیمہ

اتوار 19 جنوری 2025 11:45

لاہور(اُردو پوائنٹ اخبارتازہ ترین - این این آئی۔ 19 جنوری2025ء) پاکستان تحریک انصاف کی سینئر رہنما مسرت جمشید چیمہ نے کہا ہے کہ انتقامی کارروائیوں اور جعلی کیسزمیں سزائوں سے عمران خان کو عوام کے دلوں سے نہیں نکالا جا سکتا بلکہ ہر گزرتے دن کے ساتھ عوام کے دلوںمیں عمران خان کی محبت اورعزت مزید بڑھ رہی ہے ،بغیر کسی شک و شبہ اگر پہلے نمبر پر عمران خان کا کوئی خیر خواہ ہے تو وہ ان کی فیملی ہے،فیملی میں ان کی بیوی اور بہنیں آتی ہیں،ان کے بعد ہم جیسے کارکنوں کا نمبر آتا ہے،غیر سیاسی ہونے کے باوجود جو قربانی ان کی فیملی دے رہی وہ قابل تحسین ہے۔

ایکس پر جای اپنے بیان میں مسرت جمشید چیمہ نے کہا کہ ایک مخصوص طبقہ میری پریس کانفرنس کے بعد ایک مذموم پراپیگنڈا کر رہا ہے،بشری بی بی گرفتار ہیںاس لیے ان کے بارے میں پریس کانفرنس میں پہلے بات کی لیکن یہ کہنا کہ میں کسی کو کسی پر فوقیت دے رہی ہوں سراسر غلط ہے،ایسے مشکل مواقع پر پارٹی میں تفریق ڈالنے کے لیے یہ ٹولہ سرگرم ہو جاتا ہے،میں نے اسی پریس کانفرنس میں عمران خان کی بہنوں کا بھی انہی الفاظ میں ذکر کیا ۔

(جاری ہے)

انہوںنے کہا کہ جس طرح 26 نومبر کو کارکنان پر فسطائیت کا پہاڑ توڑا جا رہا تھا تو عمران خان کی پوری فیملی کارکنان کے درمیان موجود تھی اسی طرح جیسے عمران خان کی رہائی کی تحریک میں علیمہ خان اور عظمی خان کو گرفتار کیا گیا وہ بھی ہم سب نے دیکھا، عمران خان کی بہن نورین خان کی قربانی بھی ہم سب کے سامنے ہے جیسے ان کا لعل حسان نیازی ملٹری ٹرائل کے بعد سزا کاٹ رہا ہے اور وہ پھر بھی ہر جگہ موجود ہوتی ہیں۔

انہوںنے کہا کہ چونکہ بشری بیگم کو 7 سال سزا سنائی گئی تھی تو ان کا ذکر پہلے کیا گیا،عمران خان کی فیملی میں نہ کوئی مقابلہ ہے اور نہ کوئی موازنہ ہے،اس وضاحت کا مقصد یہ ہے کہ اگر کسی کو غلط فہمی ہوئی تو ان کی تصحیح ہو جائے اور جو پراپیگنڈا کر رہے ہیں ان کو بھی پیغام مل جائے۔