پاکستان اور ویسٹ انڈیز کے مابین پہلا ٹیسٹ پاکستانی گرائونڈ پر مختصر ترین میچ ثابت ہوا

ملتان ٹیسٹ محض 177.2 اوورز میں ختم ہوگیا

ذیشان مہتاب اتوار 19 جنوری 2025 15:41

پاکستان اور ویسٹ انڈیز کے مابین پہلا ٹیسٹ پاکستانی گرائونڈ پر مختصر ..

ملتان (اردو پوائنٹ تازہ ترین اخبار ۔ 19 جنوری 2025ء ) پاکستان اور ویسٹ انڈیز کے مابین ملتان میں کھیلا گیا پہلا ٹیسٹ پاکستانی گرائونڈ میں مختصر ترین مقابلہ ثابت ہوا۔

ملتان ٹیسٹ محض 177.2 اوورز میں ختم ہوگیا جن میں سے پاکستان نے پہلی اننگز میں 68.5 اور دوسری اننگز میں 46.4 اوورز کھیلے، ویسٹ انڈین ٹیم پہلی اننگز میں صرف 25.2 اوورز میں 137 رنز بنا کر آل آئوٹ ہوئی جب کہ دوسری اننگز میں 36.3 اوورز کھیل سکی۔

اس سے قبل 2 میچز کی سیریز کے پہلے ٹیسٹ میں پاکستان نے ویسٹ انڈیز کو 127 رنز سے شکست دیکر سیریز میں 0-1 کی برتری حاصل کرلی ۔

ملتان کرکٹ سٹیڈیم میں کھیلے جانے والے میچ میں پاکستان نے تیسرے روز کھیل کا آغاز کیا تو مڈل آرڈر بیٹر سعود شکیل بغیر کسی رنز کا اضافہ کیے وکٹ گنوابیٹھے جبکہ کامران غلام 27 رنزبنانے میں کامیاب ہوئے، دیگر کھلاڑیوں میں محمد رضوان 2، نعمان علی 9، آغا سلمان 14، ساجد خان 5 اور خرم شہزاد صفر پر آؤٹ ہوئے۔

(جاری ہے)

پاکستانی ٹیم اپنی دوسری اننگز میں 157 رنز بناکر آل آؤٹ ہوگئی اور ویسٹ انڈیز کو جیت کیلئے 251 رنز کا ہدف دیا۔

ویسٹ انڈیز کی جانب سے دوسری اننگز میں جومل واریکن نے 7 اور گڈاکیش موتی نے ایک وکٹ حاصل کی۔

251 رنز کے ہدف کے تعاقب میں مہمان ٹیم کا آغاز ایک مرتبہ پھر مایوس کُن رہا، کپتان کریگ براتھویٹ 12، میکائل لوئس 13، کیسی کارٹی 6، کیویم ہوج صفر اور جسٹن گریوز 9، ٹیون املاچ 14، کیون سنکلیئر 10، گڈاکیش موتی اور جومل واریکن صفر پر پویلین روانہ ہوئے۔

ویسٹ انڈیز کی جانب سے ایلک ایتھنیز 55 رنز کی مزاحمتی اننگز کھیلی تاہم وہ ٹیم کو جتوانے میں ناکام رہے۔

پاکستان کی جانب سے دوسری اننگز میں ساجد خان نے 5 اور ابرار احمد نے 4 کھلاڑیوں کو پویلین کی راہ دکھائی۔