گورنر کے پی کو آئی ایم سائنسز کے بورڈ آف گورنرز کے عہدے سے بھی فارغ کرنے کا فیصلہ

کے پی اسمبلی میں بل پیش،گورنر سے عہدہ لے کر وزیر علیٰ کو دیا جائیگا، جامعات کی چانسلر شپ پہلے ہی ان سے لے لی گئی ہے

پیر 3 فروری 2025 21:25

پشاور(اُردو پوائنٹ اخبارتازہ ترین - این این آئی۔ 03 فروری2025ء)جامعات کی چانسلر شپ کے بعد گورنر خیبر پختونخوا کو آئی ایم سائنسز کے بورڈ آف گورنرز کے عہدے سے بھی فارغ کرنے کا فیصلہ کرلیا گیا۔میڈیارپورٹس کے مطابق اس سلسلے میں خیبرپختونخوا اسمبلی میں انسٹی ٹیوٹ آف مینجمنٹ سائنسز(ترمیمی)بل 2025 پیش کردیا گیا جس میں آئی ایم سائنسز آرڈیننس 2002 کو ترامیم کے ساتھ ایکٹ میں تبدیلی کرنے کی تجویز دی گئی ہے۔

بل میں گورنر سے بورڈ آف گورنر چیئرمین کا عہدہ لے کر وزیر علیٰ کو دیا جائے گا جس کیلئے آئی ایم سائنسز آرڈیننس 2002 کی شق 10کلاز ون میں ترمیم تجویز کی گئی ہے۔ترمیم کے بعد گورنر خیبرپختونخوا کے بجائے وزیر اعلیٰ خیبرپختونخوا بورڈ آف گورنرز کے چیئرمیں اور 13ممبرز بورڈ آف گورنرز میں شامل ہوں گے۔

(جاری ہے)

دریں اثناء کے پی اسمبلی پاک آسٹریا فاشو خولے انسٹی ٹیوٹ آف اپلائیڈ سائنسز اینڈ ٹیکنالوجی ہری پور بل 2025 پیش کیا گیا۔

ایم پی اے اکبر ایوب نے اس حوالے سے تحریک پیش کی۔مزید برآں خیبرپختونخوا اسمبلی نے خیبرپختونخوا شرعی نظام عدل ریگولیشن (ترمیمی)بل مجریہ 2025کی منظوری دے دی۔ گزشتہ روز وزیر قانون آفتاب عالم نے اس حوالے سے تحریک پیش کی۔ اس کے لئے شریعت نظام عدل ریگولیشن 2009 میں ترامیم کی گئی ہیں، یہ ایکٹ فوری طور پر نافذ العمل ہوگا۔مذکورہ ترمیم سیکشن 6Aخیبرپختونخوا ریگولیشن 2009ذیلی دفعہ نمبر(1)میں شریعہ نظام عدل ریگولیشن 2009خیبرپختونخوا ذیلی نمبر 1،سیکشن کی ذیلی دفعہ میں دوسری شرط کو تبدیل کیا گیا ہے جس کے تحت مزید یہ کہ حکومت وقتاً فوقتاً معاونین قاضی کی مدت ملازمت میں ان کی کارکردگی سے مشروط مناسب وقت کیلئے توسیع کرتی ہے۔

اس کا مقصد ہے شریعہ نظام عدل ریگولیشن 2009 میں ترمیم معاونین قاضی کی مدت ملازمت میں وقتی طور پر توسیع کی دشواری کو دور کیا جائے۔