سستی بجلی کے بغیرملکی ترقی ناممکن ہے۔ 25 روپے یونٹ کی جائے،میاں زاہد حسین

کراچی (اُردو پوائنٹ اخبارتازہ ترین - این این آئی۔ 05 فروری2025ء)نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدر، ایف پی سی سی آئی پالیسی ایڈوائزری بورڈ کے چیئرمین اورسابق صوبائی وزیرمیاں زاہد حسین نے کہا ہے کہ سستی بجلی کے بغیرملکی ترقی ناممکن ہے۔ حکومت بجلی کے نرخ کم کرنے کواولین ترجیح دے تاکہ عوام اورکاروباری برادری سکھ کا سانس لے سکیاور ملکی ترقی کی رفتارمیں اضافہ کیا جا سکے۔

میاں زاہد حسین نے کاروباری برادری سے بات چیت کرتے ہوئے کہا کہ ایف پی سی سی آئی کی طرف سے آئی پی پیز کی لوٹ مار پر مسلسل توجہ دلائی گئی ہے جس کے نتیجے میں کئی آئی پی پیز کے معاہدے منسوخ اور تبدیل کیے گئے ہیں اور قومی خزانے کی 400 ارب روپے کی بچت بھی ممکن ہوئی ہے اور حکومت کی طرف سے بجلی کے نرخ میں معقول کمی کا وعدہ بھی کیا گیا ہے۔

(جاری ہے)

انڈیپنڈنٹ پاورپروڈیوسرز(آئی پی پیز) کی منافع خوری کی وجہ سے پاکستان میں بجلی کے نرخ خطے میں سب سے زیادہ ہیں جبکہ معیشت کوبھی بھاری نقصان پہنچ چکا ہے۔

بجلی اتنی مہنگی ہوچکی ہے کہ عام آدمی اور صنعتیں اسکے بل بھرنے کے قابل نہیں رہے ہیں۔ میاں زاہد حسین نے کہا کہ بجلی کی قیمت کو 25 روپے فی یونٹ پر لانے کی فوری ضرورت ہے جس کے اثرات عوام اورمعیشت سمیت ہرشعبے پرپڑیں گے جبکہ صنعتی اورزرعی پیداوار سستی ہوجائے گی جس سے پاکستان کی ایکسپورٹس میں کم از کم پانچ ارب ڈالر سالانہ کا اضافہ ممکن ہو سکے گا اور عالمی قرضوں کی ادائیگی میں سہولت پیدا ہوگی۔

میاں زاہد حسین نے مزید کہا کہ موجودہ حکومت معاشی معاملات کوبہتر کرنے کے لئے ہمہ وقت کوشاں ہے جس کے نتیجے میں مہنگائی کی شرح دو فیصد تک گر چکی ہیاور بینک مارک اپ میں بھی منجملہ دس فیصد کمی کی جا چکی ہے۔ میاں زاہد حسین نے کہا کہ اس بہتر ہوتی ہوئی معاشی صورتحال میں کچھ لوگ مسلسل اوربلاجواز احتجاج میں مصروف ہیں۔ ان لوگوں نے نومنتخب امریکی صدرسے جو امیدیں لگائی ہوئی تھیں وہ پوری نہیں ہو سکیں۔

پاکستان کی مسلح افواج دہشت گردی کو کچلنے کے لئے مسلسل اپنی قیمتی جانوں کی قربانیاں دے رہی ہیں ان کو سیاست میں گھسیٹنا انتہائی افسوسناک ہے اوراب مایوس سیاستدان خیبر پختونخواہ اورلاہورمیں احتجاج کی منصوبہ بندی کررہے ہیں۔ پنجاب میں ان لوگوں کوپہلے بھی دوبارناکامی ہوئی ہے اوراس باربھی کسی کامیابی کا کوئی امکان نہیں ہے اس لئے ان لوگوں کو چاہیے کہ ملک کی تعمیر اور ترقی میں شامل ہو کر اپنا مثبت کردار ادا کریں تاکہ ان کے منفی تاثر کا ازالہ ہو سکے۔