بابر اعظم کا موبائل فون گم ہوگیا

’’میں نے اپنا فون اور اس میں موجود سارے نمبرز کھو دیے ہیں، جیسے ہی وہ مجھے واپس ملے گا میں سب کے پاس واپس آؤں گا‘‘ : سابق کپتان کا ٹویٹ

ذیشان مہتاب جمعرات 6 فروری 2025 16:01

لاہور (اردو پوائنٹ تازہ ترین اخبار ۔ 6 فروری 2025ء ) قومی ٹیم کے سابق کپتان بابر اعظم کا موبائل فون چوری ہوگیا۔

بابر اعظم نے اپنے ٹویٹر اکائونٹ پر اس کی اطلاع دیتے ہوئے لکھا کہ ’’ میں نے اپنا فون اور اس میں موجود سارے نمبرز کھو دیے ہیں۔ جیسے ہی وہ مجھے واپس ملے گا میں سب کے پاس واپس آؤں گا‘‘۔

واضح رہے کہ بابر اعظم ان دنوں تین ملکی سیریز اور چیمپئنز ٹرافی کی تیاریوں میں مشغول ہیں ۔

سہ فریقی ٹورنامنٹ اور آئی سی سی چیمپئنز ٹرافی میں فخر زمان کے ساتھ پاکستانی اننگز کا آغاز ٹیم کے سب سے مستند اور تجربہ کار بیٹر بابر اعظم کریں گے۔ قومی ٹیم کی انتظامیہ نے بابر اعظم کو میگا ایونٹ اور اس کے بعد پاکستان ٹیم میں وہ کردار ادا کے لئے کہا ہے جو بھارتی ٹیم میں سچن ٹنڈولکر ادا کرتے تھے، بابر اعظم نے یہ مشکل مشن مکمل کرنے پر آمادگی ظاہر کی ہے۔

(جاری ہے)

پاکستان نے گزشتہ روز جس 15 رکنی ٹیم کا اعلان کیا ہے اس میں واحد ریگولر اوپنر فخر زمان ہیں جبکہ قومی سلیکٹر اسد شفیق نے کہا ہے کہ ان کے ساتھ دوسرے اوپنر کا فیصلہ میچ سے قبل کیا جائے گا۔

ٹیم انتظامیہ کے حد درجہ مصدقہ ذرائع نے تصدیق کی ہے کہ کیپ ٹاﺅن ٹیسٹ کے پہلے دن پہلے جب صائم ایوب کے ٹخنے پر چوٹ لگی اسی وقت عاقب جاوید اور دیگر کوچز کو اندازہ تھا کہ صائم ایوب کی انجری سنجیدہ نوعیت کی ہے وہ دو سے ڈھائی ماہ میں فٹ ہو سکیں گے اس لئے محمد رضوان، عاقب جاوید، بیٹنگ کوچ شاہد اسلم اور سلیکٹرز نے بابر اعظم سے کئی نشستیں کیں اور انہیں قائل کیا گیا کہ وہ ٹیسٹ اور ون ڈے میں اننگز اوپن کریں گے۔

بابر اعظم کو بتایا گیا کہ سلیکٹرز چاہتے ہیں کہ آپ پاکستانی ٹیم میں وہ کردار ادا کریں جو بھارتی ٹیم میں سچن ٹنڈولکر نے ادا کیا تھا۔ ذرائع کا کہنا ہے کہ بابر اعظم سے کہا گیا ہے کہ وہ اننگز اوپن کریں اور ون ڈے اننگز میں تمام اوورز کھیلنے کی کوشش کریں، بابر اعظم سلیکٹرز، کپتان اور ہیڈ کوچ کی بات سن کر قائل ہو گئے اور وہ مستقبل میں ون ڈے میچوں خاص طور پر سہ فریقی ٹورنامنٹ اور چیمپئنز ٹرافی میں اننگز اوپن کرنے کے لئے رضا مند ہو گئے ہیں۔

ٹیم انتظامیہ کا خیال ہے کہ بابر اعظم سچن ٹنڈولکر کی طرح پاکستان کے ون ڈے سکواڈ میں کلیدی کردار ادا کریں گے۔

30 سالہ بابر اعظم نے پاکستان کی جانب سے 123 ون ڈے انٹرنیشنلز میں 19 سنچریوں اور 23 نصف سنچریوں کی مدد سے 5957 رنز 56 کی اوسط سے بنائے ہیں، وہ ٹی 20 میں ریگولر اوپننگ کرتے ہیں۔بابر اعظم اس سے قبل 2015ء میں انگلینڈ کے خلاف 2 ون ڈے میچوں میں اننگز اوپن کرچکے ہیں لیکن انہوں نے زیادہ تر ون ڈے میچ تیسرے اور چوتھے نمبر پر کھیلے ہیں، حالیہ سالوں میں بابر اعظم ون ڈاﺅن پر بیٹنگ کرتے تھے۔