ماضی میں وہ بطور ایئر ہوسٹس بھی کام کر چکی ہیں،مشی خان

ٹوٹے ہوئے دل پر آنسو بہاتے رہنا سمجھداری نہیں، زندگی میں کچھ لوگوں کا بچھڑنا نقصان نہیں ہوتا،اداکارہ

جمعہ 7 فروری 2025 11:45

ماضی میں وہ بطور ایئر ہوسٹس بھی کام کر چکی ہیں،مشی خان

کراچی (اُردو پوائنٹ اخبارتازہ ترین - این این آئی۔ 07 فروری2025ء)سینئر اداکارہ و ٹی وی میزبان مشی خان نے انکشاف کیا ہے کہ ماضی میں وہ بطور ایئر ہوسٹس بھی کام کر چکی ہیں اور یہ کہ شوبز کیریئر کے بعد انہوں نے فضائی میزبانی کی ملازمت اختیار کی۔مشی خان نے حال ہی میں سما کے مارننگ شو میں شرکت کی، جہاں انہوں نے زندگی کے مختلف پہلووں کے علاوہ اپنے پہلے ڈرامے اور آڈیشن کے دلچسپ تجربات بھی شیئر کیے۔

اداکارہ کا کہنا تھا کہ ٹوٹے ہوئے دل پر آنسو بہاتے رہنا سمجھداری نہیں، زندگی میں کچھ لوگوں کا بچھڑنا نقصان نہیں ہوتا، لہذا خود کو سنبھال کر آگے بڑھ جانا چاہیے۔آئیڈیل شریک حیات کے حوالے سے بات کرتے ہوئے انہوں نیکہا کہ زندگی میں آئیڈیل یا بے عیب کچھ نہیں ہوتا اور یہی اس کی خوبصورتی ہے۔

(جاری ہے)

ان کا مزید کہنا تھا کہ اگر کوئی سوشل میڈیا پر میرے خلاف باتیں کرتا ہے تو میں اسے گھر تک چھوڑ کر آتی ہوں، جب کہ اگر کوئی جاننے والا ایسی حرکت کرے تو اسے دوسرا موقع دینے کی روادار نہیں ہوں۔

انہوں نے بتایا کہ مجھے کئی لوگ سمجھاتے ہیں کہ معاف کرنے والی بنو، لیکن معاف کرنے والی ذات اللہ کی ہے،میں اپنے خلاف باتیں کرنے والے شخص دور رہنا پسند کرتی ہوں اور رابطہ منقطع کر دیتی ہوں۔مشی خان نے اپنے والد کا تذکرہ کرتے ہوئے کہا کہ زندگی کے اس موڑ پر بابا کی کمی بہت محسوس ہوتی ہے، جن کا انتقال عرسہ کی شوٹنگ مکمل ہونے کے کچھ روز بعد ہوگیا تھا۔

اداکارہ نے اپنے والد کو یاد کرتے ہوئے کہا کہ مجھے ان کی باتیں آج تک یاد ہیں اور اب بابا کی دی گئی نصیحتوں کا مطلب سمجھ آتا ہے،اداکارہ نے بتایا کہ وہ بطور ہوائی میزبان بھی کام کر چکی ہیں۔بطور ایئر ہوسٹس کیرئر پر بات کرتے ہوئے ان کا کہنا تھا کہ اس ملازمت نے میری زندگی بدل کر رکھ دی، مجھے خود انحصاری اور خود اعتمادی سکھائی۔ان کا مزید کہنا تھا کہ ایئر لائن کی ملازمت کے دوران کبھی محسوس نہیں ہوا کہ شوبز انڈسٹری سے وابستہ تھی۔