Live Updates

ہم نے بدلہ لینے کا سوچ لیا تو برداشت نہیں کر سکو گے، ادارے مینڈیٹ چور حکمرانوں کی بجائے قوم کی آواز بنیں

عمران خان نظریہ بن چکے ،نظریہ مرتا ہے نہ ڈرتا ہے، فوج اور عوام کو حکومت لڑوا رہی ، ہم بات چیت کیلئے تیار یہ بھاگ رہے ہیں، اپنا حق آئین و قانون کی بالادستی تک مانگتے رہیں گے،وزیراعلی خیبرپختونخوا کا صوابی جلسے سے خطاب

ہفتہ 8 فروری 2025 20:30

ہم نے بدلہ لینے کا سوچ لیا تو برداشت نہیں کر سکو گے، ادارے مینڈیٹ چور ..

صوابی (اُردو پوائنٹ اخبارتازہ ترین - این این آئی۔ 08 فروری2025ء)وزیراعلی خیبرپختونخوا علی امین گنڈا پور نے کہا کہ اگر ہم نے بدلہ لینے کا سوچ لیا تو برداشت نہیں کر سکو گے،ادارے مینڈیٹ چور حکمرانوں کی بجائے قوم کی آواز بنیں ،پی ٹی آئی ،عمران خان نظریہ بن چکے ،نظریہ مرتا ہے نہ ڈرتا ہے، فوج اور عوام کو حکومت لڑوا رہی ہے، ہم تو بات چیت کیلئے تیار یہ بھاگ رہے ہیں، اپنا حق آئین و قانون کی بالادستی تک مانگتے رہیں گے۔

صوابی میں پی ٹی آئی کے احتجاجی جلسے سے خطاب کرتے ہوئے علی امین گنڈا پور نے کہا کہ ہم اپنے شہدا اور غازیوں کو سلام پیش کرتے ہیں اور انہیں نہیں بھولیں گے،ہمیں مجبور نہ کیا جائے، اگر بدلہ لینے کا سوچ لیا پھر تم برداشت نہیں کرسکو گے،قرآن مجید میں اللہ نے خون کا بدلہ خون کا حکم دیا ہے۔

(جاری ہے)

انہوں نے کہا کہ فوج اور عوام کو حکومت لڑوا رہی ہے،دونوں کے درمیان فاصلے بڑھ گئے ہیں اور جو فاصلے بڑھ رہے ہیں یہ قوم کیلئے نقصان دہ ہے، میرا اداروں سے مطالبہ ہے کہ مینڈیٹ چور حکمرانوں کی بجائے قوم کی آواز بنیں ۔

انہوں نے کہاکہ ہم تو بات چیت کیلئے تیار ہیں جبکہ یہ بھاگ رہے ہیں، حکومت بات چیت سے بھاگ رہی ہے تو اس کا جواب بھی ہمیں دینا آتا ہے،قوم کے پیسوں سے خریدے گئے ہتھیار اگر ہمارے اوپر استعمال ہوتے ہیں تو ہمارے پاس بھی ہتھیار ہیں۔ انہوں نے کہا کہ ہمارا صوبہ دہشت گردی کا شکار ہے اور عوام کے تعاون کے بغیر دہشت گردی کا مقابلہ ممکن نہیں۔ انہوں نے کہا کہ ۔

انہوں نے کہا کہ بانی چیئر مین جیل میں بیٹھ کر جیت گیا، ہم عمران خان کی قیادت میں ملک میں قانون کی بالادستی ، آئین کی کی حکمرانی کیلئے آگے بڑھیں گے، اس راستے میں ہمارے مقابلے میں جو بھی آئیگاہم لڑیں گے اور مریں گے اور اپنا حق آئین و قانون کی بالادستی تک مانگتے رہیں گے۔ انہوں نے کہا کہ اس معاملے میں ہماری آواز ایک ہی ہے اور ہم ملکر آئین کا تحفظ مانگ رہے ہیں۔انہوں نے کہا کہ پی ٹی آئی اور عمران خان نظریہ بن چکے ہیں، نظریہ مرتا نہیں نہ ہی ڈرتا ہے، تم ایوانوں میں بیٹھ کر بھی ہار گئے ہیں کیونکہ تمہارے پاس کوئی نظریہ نہیں ہے۔