Live Updates

سرکاری ملازمین کی حاضریاں لگا کر بھی 5 ہزار بندے اکٹھے نہ کرسکے، عظمیٰ بخاری

خیبرپختونخواہ نے بھی بانی پی ٹی آئی کی انتشار اور جلاؤ گھیراؤ کی سیاست کو مسترد کردیا؛ وزیراطلاعات پنجاب کا پی ٹی آئی کے صوابی جلسے پر طنز

ساجد علی اتوار 9 فروری 2025 14:15

سرکاری ملازمین کی حاضریاں لگا کر بھی 5 ہزار بندے اکٹھے نہ کرسکے، عظمیٰ ..

لاہور ( اُردو پوائنٹ اخبارتازہ ترین۔ 09 فروری 2025ء ) مسلم لیگ ن کی رہنماء اور صوبہ پنجاب کی وزیر اطلاعات عظمیٰ بخاری نے کہا ہے کہ خیبرپختونخواہ نے بھی بانی پی ٹی آئی کی انتشار اور جلاؤ گھیراؤ کی سیاست کو مسترد کردیا ہے، اسی لیے حکومتی وسائل کے استعمال اور سرکاری ملازمین کی جلسہ گاہ میں حاضریاں لگا کر بھی پانچ ہزار بندے اکٹھے نہیں کرسکے۔

اپنے ایک بیان میں تحریک انصاف کے صوابی میں ہوئے جلسے پر تبصرہ کرتے ہوئے انہوں نے کہا کہ جنید اکبر اپنے پہلے امتحان میں ہی بری طرح فیل ہوگئے ہیں، علی امین گنڈا پور نے حسب روایت لچرپن سے بانی پی ٹی آئی کو خوش کرنے کی ناکام کوشش کی، پنجاب کے کسی ضلع سے ان کے لوگ نہیں نکلے، جو نکلے انہوں نے فرمائشی گرفتاریاں دیں تاکہ بانی کے سامنے نمبر ٹانگ سکیں۔

(جاری ہے)

صوبائی وزیر اطلاعات کا کہنا ہے کہ 9 مئی اور 26 نومبر کی ناکام بغاوتوں کے بعد قوم فتنے کی احتجاجی سیاست سے تنگ آچکے ہیں، خیبرپختونخواہ کے نوجوانوں نے بھی دیکھ لیا، جو اب کہتے ہیں پنجاب کے نوجوانوں کو الیکٹرک بائیکس، سکالرشپ مل رہے تو ہمیں بھی ملنے چاہیئے، جلد مریم نواز خیبرپختونخواہ کے بچوں کو بھی سکالرشپ دیں گی، مسلم لیگ ن کی لیڈرشپ کا ویژن پاکستان کی ترقی و خوشحالی ہے، میاں نوازشریف کی قیادت میں پاکستان دوبارہ دنیا کے نقشے پر ایک طاقتور ملک بن کر سامنے آرہا ہے۔