Live Updates

وزیراعظم رمضان پیکیج پر عملدرآمد کی حکمت عملی تیار، ایک کروڑ 60 لاکھ افراد رمضان پیکیج سے مستفید ہوں گے

رواں سال 12 لاکھ اضافی شہریوں کو پیکیج ملے گا، وزیراعظم رمضان پیکیج کے تحت شہریوں کو مختلف اشیا پر 10 ارب کی سبسڈی دی جائے گی

فیصل علوی جمعرات 13 فروری 2025 14:10

وزیراعظم رمضان پیکیج پر عملدرآمد کی حکمت عملی تیار، ایک کروڑ 60 لاکھ ..

اسلام آباد(اردوپوائنٹ اخبار تازہ ترین۔13فروری 2025ء) وزیراعظم رمضان پیکیج پر عملدرآمد کی حکمت عملی تیار کرلی گئی، ایک کروڑ 60 لاکھ افراد رمضان پیکیج سے مستفید ہوں گے،رواں سال 12لاکھ اضافی شہریوں کو پیکیج ملے گا،وزیراعظم رمضان پیکیج کے تحت شہریوں کو مختلف اشیا پر 10 ارب کی سبسڈی دی جائے گی جبکہ بی آئی ایس پی کے رجسٹرڈ ایک کروڑ 50 لاکھ صارفین مستفید ہوں گے۔

حکومت ملک بھرمیں 800 موبائل یوٹیلیٹی سٹورز قائم کرے گی۔ پورے ملک میں 300 آٹا سیل پوائنٹس قائم کئے جائیں گے جبکہ موبائل یوٹیلیٹی اسٹورز اور آٹا سیل پوائنٹ یکم سے 30 رمضان تک آپریشنل رہیں گے۔موبائل یوٹیلیٹی سٹورز اور آٹا سیل پوائنٹ کی لوکیشن معلوم کرنے کیلئے موبائل ایپ تیار کرلی ہے۔ لوکیشن معلوم کرنے کیلئے صارفین کو موبائل ایپ ڈاؤن لوڈ کرنا ہوگی، بی آئی ایس پی اور نادرا سے صارفین کی تصدیق کی جائے گی۔

(جاری ہے)

ویئر ہاؤسز اور پوائنٹ آف سیل پرمانیٹرنگ کا سخت نظام ہوگا۔شہریوں کی شکایات سننے کیلئے 10 ٹول فری فون لائن موجودہوں گی۔ وزارت صنعت و پیداوار میں بھی مانیٹرنگ سیل قائم ہوگا۔یوٹیلیٹی سٹورز پر کیمروں کے ذریعے لائیو سٹریمنگ کا نظام نصب ہو گا، یوٹیلیٹی سٹورزکارپوریشن ہیڈ آفس میں مانیٹرنگ سیل قائم کیا جائے گا۔گزشتہ سال کی نسبت رواں سال 12 لاکھ اضافی شہریوں کو رمضان پیکیج ملے گا۔

پیکیج کے تحت حکومت کی جانب سے شہریوں کو مختلف اشیا پر 10 ارب کی سبسڈی دی جائے گی۔یاد رہے کہ گزشتہ روز وزیراعظم شہباز شریف نے رمضان المبارک میں اشیائے خوردو و نوش کی مناسب قیمتوں پر فراہمی کے حوالے سے ابھی سے حکمت عملی بنانے کی ہدایت کی تھی۔ انہوں نے وفاقی اور صوبائی حکومتیں مل کر عام آدمی کو سستے داموں اشیائے خور و نوش کی فراہمی یقینی بنانے کی بھی ہدایت کی تھی۔وفاقی کابینہ کے اجلاس سے خطاب کرتے ہوئے وزیراعظم شہباز شریف کا کہنا تھا کہ وفاقی اور صوبائی حکومتیں مل کر عام آدمی کو سستے داموں اشیائے خور و نوش کی فراہمی یقینی بنائیں۔وزیراعظم نے کہا تھاکہ عوام کو اشیائے خورونوش کی ارزاں نرخوں پر فراہمی حکومت کی اولین ترجیح تھی۔