Live Updates

آئی سی سی چیمپئنز ٹرافی، شائقین کرکٹ اسٹیڈیم میں کونسی چیزیں نہیں لاسکتے؟

پاکستان اور نیوزی لینڈ کے درمیان افتتاحی میچ پاکستانی وقت کے مطابق دوپہر 2 بجے شروع ہوگا

ذیشان مہتاب بدھ 19 فروری 2025 11:27

آئی سی سی چیمپئنز ٹرافی، شائقین کرکٹ اسٹیڈیم میں کونسی چیزیں نہیں لاسکتے؟

لاہور (اردو پوائنٹ تازہ ترین اخبار ۔ 19 فروری 2025ء ) شائقین کرکٹ کا انتظار ختم ہوگیا، 29 برس بعد پاکستان کی سرزمین پر آئی سی سی ایونٹ کا انعقاد ہونے جارہا ہے۔

آئی سی سی چیمپئنز ٹرافی کا آغاز آج سے ہو رہا ہے، 8 بہترین ٹیموں میں چیمپئن بننے کی جنگ ہوگی۔ چیمپئنز ٹرافی کے پہلے میچ میں میزبان پاکستان اور نیوزی لینڈ کی ٹیمیں آج نیشنل اسٹیڈیم کراچی میں مدمقابل ہوں گی جس کی تمام تیاریاں مکمل کرلی گئی ہیں، اب صرف شائقین کو انتظار ہے ٹیموں کو میدان میں ایکشن میں دیکھنے کا۔

اس موقع پر سکیورٹی کے سخت انتظامات کیے گئے ہیں، شائقین کرکٹ پر بھی کچھ پابندیاں عائد کی گئی ہیں، شائقین کیلئے کراچی اسٹیڈیم میں کچھ چیزوں کا لانا ممنوعہ قرار دیا گیا ہے۔

(جاری ہے)

1: پاور بینک

نیشنل سٹیڈیم کراچی میں شائقین اپنے ساتھ موبائل چارج کرنے کے لیے پاور بینک نہ لے جائیں، سکیورٹی اہلکار پاور بینک سمیت فینز کو اسٹیڈیم میں داخل ہونے نہیں دیں گے۔

2: ائیر پوڈز،ہیڈ فونز، ہینڈ فری

نیشنل اسٹیڈیم کراچی میں شائقین کو اپنے ساتھ کسی بھی قسم کے ائیرپوڈز، ہیڈ فونز یا ہینڈ فریز ساتھ لے کر جانے کی اجازت نہیں ہے۔ اس لیے پریشانی سے بچنا چاہتے ہیں تو اپنے ساتھ اسٹیڈیم میں اس قسم کی کوئی بھی ڈیوائس ساتھ نہ لے کر جائیں۔

3: چھالیہ ، پان، گٹکا

کراچی کے نیشنل اسٹیڈیم میں شائقین کو چھالیہ ، پان، گٹکا ساتھ لے جانا منع ہے۔

4: کھانے پینے کی اشیاء

پانی کی بوتل، چپس، کولڈرنک وغیرہ بھی شائقین کو اسٹیڈیم کے اندر لے جانے کی اجازت نہیں ہوگی۔

واضح رہے کہ آئی سی سی چیمپئنز ٹرافی میں پاکستان اور نیوزی لینڈ کے درمیان افتتاحی میچ پاکستانی وقت کے مطابق دوپہر 2 بجے شروع ہوگا۔