آن لائن ڈیٹنگ، آسٹریلوی خاتون 13 کروڑ 90 لاکھ روپے سے محروم

کینبرا(اُردو پوائنٹ اخبارتازہ ترین - این این آئی۔ 19 فروری2025ء)آن لائن ڈیٹنگ سائٹس کی مدد سے جیون ساتھی تلاش کرنے کی کوشش میں 57 سالہ آسٹریلوی خاتون 7 لاکھ 80 ہزار آسٹریلوی ڈالر13 کروڑ 90 لاکھ روپے سے محروم ہو گئی۔بھارتی ٹی وی کے مطابق اینیٹ فورڈ نامی خاتون نے اپنی 33 سالہ شادی ختم ہونے کے بعد نئے جیون ساتھ کی تلاش کے لئے آن لائن ڈیٹنگ سائٹ پلینٹی آف فش سے مددلینے کی کوشش کی جہاں ان کی ملاقات ولیم نامی شخص سے ہوئی۔

کچھ ماہ تک روابط رکھنے کے بعد ولیم نے ان کو بتایا کہ کوالالمپور میں اس کے دفتر کے باہر جھگڑے کے دوران اس کا پرس چوری ہو گیا ہے اور اسے فوری اخراجات کے لئے 5 ہزار ڈالر کی ضرورت ہے جو اینیٹ نے اسے دے دیئے۔اس کے بعد ولیم کے مطالبات میں اضافہ ہونے لگا اور اس نے کہا کہ چونکہ اس کے پرس میں اس کے اے ٹی ایم کارڈز بھی تھے اور وہ اپنے اکائونٹس تک رسائی کے قابل نہیں رہا اور اسے ہسپتال کے بلوں، ہوٹلوں میں قیام اور اپنے ملازمین کو تنخواہیں ادا کرنے کے لئے اضافی رقم کی ضرورت ہے۔

(جاری ہے)

اینیٹ فورڈ کے مطابق طویل بحث مباحثے کے بعد ولیم نے اسے اپنی مدد کرنے پر قائل کر لیا اور اس سے تین لاکھ آسٹریلوی ڈالر بٹورنے میں کامیاب ہو گیا۔ اینیٹ فورڈ کے مطابق اس نے پولیس سے ولیم کے خلاف شکایت کی تاہم اس کا کوئی نتیجہ نہیں نکلا۔ اینیٹ فورڈ نے 2022 میں فیس بک کے ذریعے جیون ساتھ کی تلاش کی نئی کوشش کی جس کے دوران اس کا رابطہ نیلسن نامی شخص سے ہوا جس نے اپنا تعلق ایمسٹرڈم سے بتایا۔

نیلسن نے اینیٹ فورڈ کو بتایا کہ اسے ایف بی آئی کے لئے کام کرنے والے ایک دوست کی تحقیقات میں مدد کے لئے اڑھائی ہزار ڈالر کی ضرورت ہے ۔ اینیٹ فورڈ نے یہ رقم اسے دے دی جس کے بعد نیلسن نے اسے متعدد بار ایک ہزار ڈالر ایک بٹ کوائن اے ٹی ایم میں جمع کروانے کی ہدایت کی۔اینیٹ فورڈ نے بتایا کہ بٹ کوائن اے ٹی ایم میں رقم جمع کروانے کے بعد اس کیعلم میں لائے بغیر اس کے اکائونٹ میں رقم جمع کروانے اور نکالنے کا سلسلہ شروع ہو گیا اور جب اسے اس کا علم ہوا تو اس کے اکائونٹ نے دو لاکھ 80 ہزار ڈالر کی رقم منتقل کی جاچکی تھی۔

یہ وہ رقم تھی جو اس نے اپنا گھر بیچ کر حاصل کی تھی۔ اینیٹ فورڈ نے بتایا کہ اس نے نیلسن سے ملاقات کے لئے دو بار ایمسٹرڈم کاسفر بھی کیا جس کے بعد اسے علم ہوا کہ اس کے ساتھ فراڈ ہوا ہے۔ اینیٹ فورڈ نے بتایا کہ اب وہ کام کاج کے قابل نہیں اور گھر اور رقم سے بھی محروم ہو کر شدید پریشان ہے اور اس کوشش میں ہے کہ اسے رہنے کے لئے کوئی سرکاری رہائش مل جائے۔