آقاؐ کی تمام قرابتِ پاک کی سردار سیدہ کائنات ہیں: شیخ الاسلام ڈاکٹر محمد طاہرالقادری

پیر 3 مارچ 2025 23:08

لاہور (اُردو پوائنٹ اخبارتازہ ترین - آن لائن۔ 03 مارچ2025ء) تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری نے سیدہ فاطمتہ الازہرہ سلام اللہ علیہا کے یوم وصال پر اپنے بیان میں کہا ہے کہ حضور نبی اکرمؐ کی تمام قرابت و ذریتِ پاک کی سردار اور مرکز و محور سیدہ فاطمتہ الزہرہ سلام اللہ علیہا ہیں۔ آقاؐ کی تمام قرابت سیدہ کائنات سلام اللہ علیہا کے گرد گھومتی ہے۔

آپؐ نے سیدہ کائنات سلام اللہ علیہا کو جنتی عورتوں کی سردار قرار دیا۔ انہوں نے کہا کہ سیدہ کائنات سلام اللہ علیہا وہ ہستی ہیں جن کے بارے میں تاجدارِ کائنات کا فرمان عالیشان ہے کہ فاطمہ میرے جگر کا ٹکڑا ہے اور فرمایا کہ جو شخص فاطمہ کو ناراض کرتا ہے وہ مجھے ناراض کرتا ہے۔

(جاری ہے)

سیدہ فاطمہ سلام اللہ علیہا کی زندگی سادگی، قناعت اور ایثار کا ایسا نمونہ ہے کہ جس کی دوسری کوئی مثال پیش نہیں کی جا سکتی۔

سیدہ کائنات سلام اللہ علیہا قیامت تک آنے والی خواتین کے لئے رول ماڈل ہیں۔ خواتین سیدہ کائنات سلام اللہ علیہا کی سیرت اور اس باب میں فرامین رسولؐ کا مطالعہ کریں اور پھر ان اعمال کو اختیار کریں جو سیدہ کائنات سلام اللہ علیہا کا معمول تھے۔ انہوں نے کہا کہ ایک موقع پر سیدنا علی المرتضیٰؓ نے عصمت مآب حضرت فاطمتہ الزہرہ سلام اللہ علیہا سے دریافت فرمایا عورت کے لئے کون سی شے بہتر ہی سیدہ کائنات سلام اللہ علیہا نے جواب دیا عورت کے لئے سب سے بہتر یہ ہے کہ اسے غیر مرد نہ دیکھے۔

کائنات کی اس افضل ترین بیٹی کو یہ اعزاز حاصل ہے کہ وہ جب آپؐ کی طرف آتیں تو آپؐ شفقت و محبت میں کھڑے ہو جاتے اور انہیں اپنی جگہ پر بٹھاتے۔ آپؐ جب سفر اختیار فرماتے تو سب سے آخر میں سیدہ فاطمتہ الازہرہ سلام اللہ علیہا سے گفتگو فرماتے اور سفر سے واپسی پر سب سے پہلے سیدہ کائنات کے پاس تشریف لے جاتے۔ حضرت بریدہؓ سے روایت ہے کہ حضور نبی اکرمؐ کو عورتوں میں سب سے زیادہ محبت حضرت فاطمتہ الزہرہ سلام اللہ علیہا سے تھی اور مردوں میں سے حضرت علی المرتضیٰؓ سے محبت فرماتے تھے۔