صدرآذربائیجان الہام علیوف کی یوم پاکستان پر وزیراعظم شہباز شریف اور پاکستانی عوام کو مبارکباد ، تذویراتی شراکت داری اور باہمی تعاون کو مزید وسعت دینے کے عزم کااظہار

اتوار 23 مارچ 2025 20:00

اسلام آباد (اُردو پوائنٹ اخبارتازہ ترین - اے پی پی۔ 23 مارچ2025ء) آذربائیجان کے صدر الہام علیوف نے یوم پاکستان کے موقع پروزیراعظم شہباز شریف اور پاکستان کے عوام کو مبارکباد پیش کی ہے۔ وزیراعظم شہبازشریف کو لکھے گئے تہنیتی خط میں آذربائیجان کے صدر نے کہا کہ وہ آذر بائیجان کے عوام اور اپنی طرف سے آپ کواور پاکستان کی عوام کو پاکستان کے قومی دن کے موقع پر دل کی اتھاہ گہرائیوں سے مبارکباد پیش کرتے ہوئے ان کیلئے نیک تمنائوں کا اظہار کرتا ہوں۔

انہوں نے دونوں ملکوں کے درمیان تذویراتی شراکت داری اور باہمی تعاون کی موجودہ سطح پر اطمینان کا اظہار کرتے ہوئے انہیں مزید وسعت دینے کا عزم کیا۔انہوں نے کہا کہ معیشت، ٹرانسپورٹ، لاجسٹک، توانائی، سرمایہ کاری، دفاعی صنعت اور باہمی دلچسپی کے مختلف شعبہ جات میں ہماری کامیاب مشترکہ کاوشیں ہمارے تعلقات کیلئے کلیدی اہمیت رکھتی ہیں۔

(جاری ہے)

انہوں نے کہا کہ عالمی امور پر ہمارا موقف اور باہمی تعاون دونوں ملکوں کے درمیان بھائی چارہ کا اظہار ہے جو ہمارے دونوں ملکوں اور عوام کے بنیادی مفاد میں کردار ادا کر رہا ہے۔ انہوں نے کہا کہ دونوں ملکوں کے تعلقات جامع ترقی سے جڑے ہیں جن کی بنیادیں باہمی ثقافتی اقدار اوریکجہتی سے مزین اور احترام اور اعتماد پر محیط ہیں۔ اعلیٰ سطح کے دورے، ملاقاتیں اور رابطے ہمارے تعلقات میں نمایاں بڑھوتری کا واضح اشارہ ہے۔

صدر نے کہا کہ وہ باہمی اعتماد، مفاہمت اور اخلاص پر مبنی سودمند ملاقاتوں کو سراہتے ہیں جو گزشتہ ماہ آذر بائیجان کے سرکاری دورہ کے موقع پر ہوئیں اور جن پر ہم نے تبادلہ خیال کیا جبکہ اس دوران ہونے والے معاہدے دونوں ممالک کے تعلقات کی سمت کا تعین کریں گے۔ انشا اللہ ہم اپنے تعلقات کو مزید وسعت دیں گے۔ انہوں نے روایتی دوستی اور تذویراتی شراکت داری پر اطمینان کا اظہار کرتے ہوئے کہا کہ اس سے آزمودہ بھائی چارہ پر تعلقات اور ہمارے عوام کا اتحاد مزید مستحکم ہوگا۔ انہوں نے وزیراعظم کیلئے اچھی صحت، خوشی اور کامیابیوں کی دعا کرتے ہوئے پاکستان کے برادر عوام کیلئے امن ، خوشحالی اور بہتری کیلئے دعا کی۔