عبدالرزاق، ہاردک پانڈیا سے زیادہ اچھا آل راؤنڈر تھا، شعیب اختر نے سابق آل راؤنڈر کی تعریفوں کے پُل باندھ دیے

ہارڈ ہٹنگ پاکستان کیلئے نئی نہیں کیونکہ عبدالرزاق جیسے آل راؤنڈر کیلئے عام بات تھی لیکن پاکستان کرکٹ نے اُسے کبھی عزت نہیں دی : سابق سپیڈ سٹار

ذیشان مہتاب منگل 25 مارچ 2025 14:25

عبدالرزاق، ہاردک پانڈیا سے زیادہ اچھا آل راؤنڈر تھا، شعیب اختر نے ..

لاہور (اردو پوائنٹ تازہ ترین اخبار ۔ 25 مارچ 2025ء ) راولپنڈی ایکسپریس شعیب اختر کا چیمپئنز ٹرافی کے دوران مقامی ٹی وی چینل پر ہاردک پانڈیا اور عبدالرزاق سے متعلق دیا گیا بیان سوشل میڈیا پلیٹ فارمز پر وائرل ہوگیا۔

چیمپئنز ٹرافی کے دوران نجی ٹی وی چینل پر گفتگو کرتے ہوئے 49 سالہ سابق فاسٹ بولر شعیب اختر نے ہاردک پانڈیا کی تعریف کی اور کہا کہ میچ کے اختتامی اوورز میں آکر لمبی لمبی ہٹنگ کرنا پاکستان کیلئے نئی بات نہیں ہے۔

انہوں نے بالنگ کے حوالے سے گفتگو کرتے ہوئے کہا کہ ہاردک پانڈیا کوئی میلکم مارشل، بریٹ لی یا جواگال سری ناتھ نہیں جنہیں دیکھا جائے لیکن اسکی ذہنیت میں یہ بات ڈال دی گئی ہے کہ مضبوط ہٹر ہے، اسے مواقع دیے جاتے ہیں اور وہ پرفارم کرتا ہے۔

(جاری ہے)

شعیب اختر نے کہا کہ پانڈیا کی جانب سے ہارڈ ہٹنگ پاکستان کیلئے نئی نہیں کیونکہ عبدالرزاق جیسے آل راؤنڈر کیلئے عام بات تھی لیکن پاکستان کرکٹ نے اُسے کبھی عزت نہیں دی۔

اس موقع پر محمد حفیظ نے بھی شعیب اختر بات پر اتفاق کرتے ہوئے کہا کہ رزاق بھائی، پانڈیا سے بہت بہتر آل راؤنڈر تھے لیکن بدقسمتی سے، سسٹم نے اس کے ساتھ اچھا سلوک نہیں کیا اور انہیں اپنی صلاحیت دکھانے کا صحیح موقع فراہم نہیں کیا۔

راولپنڈی ایکسپریس نے 2010ء میں دبئی میں جنوبی افریقا کے خلاف عبدالرزاق کے 72 گیندوں پر ناقابل شکست 109 رنز کی شاندار اننگز کو یاد کرتے ہوئے کہا کہ رزاق نے مختلف پوزیشنوں پر بیٹنگ کی لیکن انہیں وہ پہچان نہیں ملی جس کے وہ حقدار تھے، سوائے جنوبی افریقہ کے خلاف اس ناقابل فراموش میچ کے! ان کی ہٹنگ اتنی زوردار تھی کہ میں نے سوچا کہ اگر بال لگی تو مجھے چیر دے گی۔

انہوں نے مزید کہا کہ پاکستان کرکٹ نے کبھی عبدالرزاق اور اظہر محمود کو وہ عزت نہیں دی، جس کے وہ حقدار تھے۔

حفیظ نے بھی 2010ء کے میچ کو یاد کرتے ہوئے کہا کہ ڈریسنگ روم میں سب ہمت ہار چکے تھے میچ کا نتیجہ معلوم تھا لیکن زراق بھائی نے اکیلے وہ میچ جتوادیا تھا، وہ واقعی نہ ناقابل فراموش اننگز تھی۔