Live Updates

سلمان اکرم راجہ نے عمران خان سے ملاقات کرنے والوں کی فہرست میں سے بابر اعوان کا نام کٹوا دیا

سیکرٹری جنرل پی ٹی آئی نے جیل حکام کو بانی پی ٹی آئی سے ملاقات کرنے والے 6 رہنماﺅں کے نام لکھوا دئیے،عدالت کا حکم ہے وہی شخص ملاقات کرے گا جس کا نام میں لکھواوں گا

فیصل علوی منگل 25 مارچ 2025 16:21

سلمان اکرم راجہ نے عمران خان سے ملاقات کرنے والوں کی فہرست میں سے بابر ..

اسلام آباد(اردوپوائنٹ اخبار تازہ ترین۔25 مارچ 2025)پاکستان تحریک انصاف کے سیکرٹری جنرل سلمان اکرم راجہ نے بانی پی ٹی آئی عمران خان سے ملاقات کرنے والوں کی فہرست میں سے رہنماءپی ٹی آئی بابر اعوان کانام کٹوا دیا،سلمان اکرم راجہ نے اڈیالہ جیل حکام کو بانی پی ٹی آئی سے ملاقات کرنے والے 6 رہنماوں کے نام لکھوا دیئے، عدالت کا حکم ہے وہی شخص ملاقات کرے گا جس کا نام میں لکھواوں گااس کے علاوہ اور کوئی دوسرا شخص ملاقات کیلئے نام نہیں دے سکتا۔

سیکرٹری جنرل پی ٹی آئی سلمان اکرم راجہ کی جانب سے جیل حکام کوعمران خان سے ملاقات کرنے والے جن رہنماﺅں کے نام لکھوائے ہیں ان میں اعظم سواتی،حامدخان،سلمان اکرم راجہ،نیاز اللہ نیازی،عزیز بھنڈاری اورظہیر عباس شامل ہیں۔

(جاری ہے)

سلمان اکرم راجہ نے ملاقات کی فہرست میں شامل پی ٹی آئی رہنماء بابر اعوان کا نام کٹوا دیا۔واضح رہے کہ گزشتہ روزاسلام آباد ہائیکورٹ نے بانی پی ٹی آئی عمران خان سے ہفتے میں 2 دن فیملی اور وکلاءکی ملاقات بحال کر دی تھی۔

عدالت نے ملاقات کے بعد سلمان اکرم راجا سمیت دیگر رہنماﺅں کو میڈیا سے بات چیت کرنے سے روک دیاتھا۔عدالت نے بانی پی ٹی آئی عمران خان سے منگل کو وکلاءاور جمعرات کو فیملی سے ملاقات کرانے کا حکم دیدیا۔ اسلام آباد ہائی کورٹ نے یہ حکم بھی دیا ہے کہ بانی پی ٹی آئی سے ملاقات کے بعد میڈیا ٹاک نہیں ہو گی جو بھی عمران خان سے ملے گا وہ میڈیا ٹاک نہیں کرے گا۔

عمران خان کے کوآرڈینیٹر سلمان اکرم راجہ جو نام دیں گے صرف وہی ملاقات کر سکے گا۔قائم مقام چیف جسٹس سرفراز ڈوگر نے ہدایت کی کہ بانی پی ٹی آئی کی بچوں سے ملاقات کیلئے ٹرائل کورٹ کو درخواست دیں۔اسلام آباد ہائیکورٹ میں بانی پی ٹی آئی عمران خان سے ملاقات نہ کروانے کے مقدمے کی لارجر بینچ میں سماعت ہوئی ۔چیف جسٹس سرفراز ڈوگر، جسٹس ارباب محمد طاہر اور جسٹس محمد اعظم پر مشتمل لارجر بینچ نے سماعت کی تھی۔چیف جسٹس اسلام آباد ہائیکورٹ کا کہنا تھا جیل ملاقات کے بعد میڈیا ٹاک کی کیا ضرورت ہے؟ یہ ملاقات کر کے چلے جائیں، ان سے انڈر ٹیکنگ لے لیتے ہیں کہ جیل ملاقات کے بعد میڈیا ٹاک نہ کریں۔