سونے، تانبے کے بڑے ذخائر ریکوڈک کی فزیبلٹی سٹڈی مکمل، 627ملین ڈالر سرمایہ کاری کی تصدیق

آئل اینڈ گیس ڈویلپمنٹ کمپنی لمیٹڈ نے ریکوڈک منصوبے کے لیے فزیبلٹی اسٹڈی مکمل کرنے کا اعلان کر دیا

منگل 25 مارچ 2025 21:10

سونے، تانبے کے بڑے ذخائر ریکوڈک کی فزیبلٹی سٹڈی مکمل، 627ملین ڈالر سرمایہ ..

اسلام آباد (اُردو پوائنٹ اخبارتازہ ترین - این این آئی۔ 25 مارچ2025ء)آئل اینڈ گیس ڈویلپمنٹ کمپنی لمیٹڈ نے ریکوڈک فزیبلٹی سٹڈی مکمل کرنے کیساتھ 627ملین ڈالر کی سرمایہ کاری کی تصدیق کردی۔رپورٹ کے مطابق یہ منصوبہ پاکستان میں دنیا کے سب سے بڑے تانبے اور سونے کے ذخائر کو ترقی دینے کی کوشش کا اہم حصہ ہے۔او جی ڈی سی ایل کے پاس اس منصوبے میں 8.33فیصد حصہ ہے، جو دیگر دو سرکاری اداروں پاکستان پٹرولیم لمیٹڈ اور گورنمنٹ ہولڈنگز (پرائیویٹ)لمیٹڈ کیساتھ 25فیصد کا مشترکہ شیئر بنتا ہے۔

مزید 25فیصد حصہ حکومت بلوچستان کے پاس ہے، اور باقی 50فیصد حصہ بیریک گولڈ کارپوریشن کے پاس ہے، جو اس منصوبے کی آپریٹر بھی ہے۔فزیبلٹی اسٹڈی کے مطابق منصوبے کی کان کنی کا عرصہ 37سال پر مبنی ہوگا، جو دو مرحلوں میں مکمل ہوگا۔

(جاری ہے)

پہلے مرحلے پر 5.6ارب ڈالر کی لاگت آئے گی اور یہ 2028ء میں کام شروع کرے گا، اس کیلئے 3ارب ڈالر کا قرض لیا جائے گا جبکہ باقی رقم شیئر ہولڈرز فراہم کریں گے۔

منصوبے کے پہلے مرحلے میں ہر سال 45 ملین ٹن خام میٹریل کو پراسیس کیا جائے گا، اور دوسرے مرحلے میں 2034سے یہ صلاحیت بڑھا کر 90ملین ٹن سالانہ کی جائے گی۔ایک اندازے کے مطابق، ریکوڈک منصوبے سے 13.1ملین ٹن تانبہ اور 17.9 ملین اونس سونا نکالا جائے گا۔او جی ڈی سی ایل کے بورڈ آف ڈائریکٹرز نے منصوبے کے لیے سرمایہ کاری بڑھا کر 627ملین ڈالر کرنے کا فیصلہ کیا ہے۔اس میں 349ملین ڈالر کمپنی کے شیئر ہولڈرز فراہم کریں گے جبکہ باقی رقم قرض کے ذریعے حاصل کی جائے گی۔