صدر مملکت کیخلاف سوشل میڈیا پوسٹ پر گرفتار ہونے والے پولیس افسر کو عدالت کا رہا کرنے کا حکم

کراچی ملیر کورٹ میں جوڈیشل مجسٹریٹ کی عدالت نے سیکشن 63 کے تحت ملزم سب انسپکٹر ابرار شاہ کو رہا کر دیا

محمد علی ہفتہ 5 اپریل 2025 22:02

کراچی (اُردو پوائنٹ اخبارتازہ ترین۔ 05 اپریل2025ء) صدر مملکت کیخلاف سوشل میڈیا پوسٹ پر گرفتار ہونے والے پولیس افسر کو عدالت کا رہا کرنے کا حکم، کراچی ملیر کورٹ میں جوڈیشل مجسٹریٹ کی عدالت نے سیکشن 63 کے تحت ملزم سب انسپکٹر ابرار شاہ کو رہا کر دیا۔ تفصیلات کے مطابق صدر مملکت آصف علی زرداری کے خلاف سوشل میڈیا پوسٹ کرنے کے بعد پولیس افسر کی گرفتاری کے معاملے پر ہفتہ کے روز اہم پیش رفت ہوئی ہفتہ کے روز کراچی کے عدالت نے گرفتار پولیس افسر کو رہا کرنے کا حکم دیا، جس کے بعد گرفتار افسر کو رہا کر دیا گیا۔

صدر مملکت کے خلاف پوسٹ پر درج پیکا ایکٹ کے تحت درج مقدمے میں جوڈیشل مجسٹریٹ ملیر نے پولیس افسر کو رہا کرنے کا حکم دیا۔ ہفتہ کے روز کراچی ملیر کورٹ میں جوڈیشل مجسٹریٹ کی عدالت کے روبرو پولیس نے پیکا ایکٹ میں گرفتار ابراہیم حیدری پولیس کے تفتیشی افسر کو عدالت میں پیش کیا۔

(جاری ہے)

عدالت نے سیکشن 63 کے تحت ملزم سب انسپکٹر ابرار شاہ کو رہا کر دیا۔

کیس کا فیصلہ سناتے ہوئے عدالت کے جج نے اہم ریمارکس دیے، عدالت نے کہا یہ کیس نہیں بنتا۔ پولیس کے مطابق تفتیشی افسر تھانہ ابراہیم حیدری ابرار شاہ نے 2 اپریل کو سوشل میڈیا پر صدر مملکت کے خلاف نازیبا الفاظ پر مبنی پوسٹ کی تھی۔ مدعی مقدمہ کے مطابق ابرار شاہ کی پوسٹ سے میری اور دیگر شہریوں کی دل آزاری ہوئی۔ ابرار شاہ کو سکھن پولیس نے مقدمہ درج کرکے گرفتار کیا تھا۔ ابرار شاہ کے خلاف ایک پولیس افسر کی مدعیت میں ہی مقدمہ درج کیا گیا تھا۔ تاہم اب عدالت نے قرار دیا ہے کہ یہ مقدمہ بنتا ہی نہیں ہے۔