Live Updates

جے یو آئی (ف) نے مائنز اینڈمنرل بل مسترد کر دیا، سینیٹ میں تحریک التواء جمع کروا دی

سربراہ جے یو آئی (ف) مولانا فضل الرحمان نے پارٹی پالیسی کیخلاف مائنز اینڈ منرلز بل کی حمایت کرنے والے پارٹی ارکان سے جواب طلب کر لیا، پارٹی بلوچستان اسمبلی سے پاس مائنز اینڈ منرلز بل کو مسترد کرتی ہے، ترجمان اسلم غوری

فیصل علوی پیر 14 اپریل 2025 13:10

اسلام آباد(اردوپوائنٹ اخبار تازہ ترین۔14اپریل 2025)جے یو آئی (ف)نے مائنز اینڈ منرل بل مسترد کر دیا، سینیٹ میں تحریک التواء جمع کروا دی، سربراہ جے یو آئی (ف) مولانا فضل الرحمان نے پارٹی پالیسی کیخلاف مائنز اینڈ منرلز بل کی حمایت کرنے والے پارٹی ارکان سے جواب طلب کر لیا، اس حوالے سے ترجمان جمعیت علماءاسلام (ف) اسلم غوری کا کہنا ہے کہ بل کی حمایت کرنے والے بعض ارکان نے پارٹی پالیسی کی خلاف ورزی کی ہے جس پرجے یوآئی(ف) کے سربراہ نے سخت نوٹس لے لیا ہے۔

ترجمان جے یو آئی نے کہا کہ پارٹی بلوچستان اسمبلی سے پاس مائنز اینڈ منرلز بل کو مسترد کرتی ہے۔ بل کیخلاف سینٹ میں تحریک التواءجمع کرا دی ہے۔پارٹی کے موقف کے برخلاف کسی قانون سازی کی حمایت ناقابل قبول ہے اور ایسی کسی بھی کوشش کو روکا جائے گا۔

(جاری ہے)

پارٹی قیادت کا موقف ہے کہ مائنز اینڈ منرلز بل صوبائی خودمختاری اور عوامی مفادات کے برخلاف ہے۔

ترجمان نے کہا کہ بلوچستان اسمبلی میں کچھ ممبران کا بل کی حمایت کرنا پارٹی پالیسی کی خلاف ورزی ہے جس کا جے یو آئی سربراہ مولانا فضل الرحمان نے نوٹس لے لیا ۔ صوبائی جماعت سے جلد از جلد تحقیقات کر کے مرکزی جماعت کو رپورٹ دینے کیلئے کہا گیا ہے۔انہوں نے کہا کہ بل کی حمایت کرنے پر سربراہ جے یو آئی (ف)مولانا فضل الرحمان نے صوبائی اسمبلی کے اراکین سے فوری طور پر وضاحت طلب کی ہے۔

اس سے قبل عوامی نیشنل پارٹی (اے این پی) نے منرلز اینڈ مائنز ایکٹ 2025 کو مسترد کردیا تھا۔ اے این پی خیبرپختونخوا ہ کے صدر میاں افتخار حسین کا کہنا تھا کہ منرلز اینڈ مائنز کا ایکٹ پہلے سے موجود تھا۔ نئے ایکٹ کی ضرورت ہی نہیں تھی یہ بل 18 ویں آئینی ترمیم کے خلاف ہے جس میں یہ فیصلہ ہوا تھا کہ ہر صوبے کا اپنے قدرتی وسائل پر حق ہوگا۔خیال رہے کہ خیبر پختونخواہ مائنز اینڈ منرلز ترمیمی بل 2025 کے معاملے پر پی ٹی آئی رہنماوں میں اختلافات سامنے آئے تھے۔

یہ بھی بتایا گیا تھا کہ پارٹی کے وٹس اپ گروپ میں مائنز اینڈ منرلز ترمیمی بل پر وزیر اعلیٰ خیبرپختونخوا ہ علی امین گنڈا پور اور پی ٹی آئی کے ایم این اے عاطف خان کے درمیان تلخ کلامی ہوئی تھی۔اس کے بعدپی ٹی آئی سیاسی کمیٹی نے معدنیات بل کی منظوری بانی پی ٹی آئی عمران خان کی اجازت سے مشروط کردی تھی جب کہ بل پر بریفنگ کیلئے منتخب نمائندوں کا اجلاس چودہ اپریل کو طلب کیا گیا تھا۔ پی ٹی آئی نے خیبرپختونخوا ہ اسمبلی میں مائنز اینڈ منرل ترمیمی بل سے متعلق بیانات پر پابندی عائد کر دی تھی۔