کینال کے معاملے پر سیاسی جماعتوں کو پرامن احتجاج کا آئینی حق حاصل ہے‘شرجیل انعام میمن

پیر 21 اپریل 2025 22:17

کراچی (اُردو پوائنٹ اخبارتازہ ترین - آن لائن۔ 21 اپریل2025ء)سندھ کے وزیر اطلاعات شرجیل انعام میمن نے کہا ہے کہ کینال کے معاملے پر سیاسی جماعتوں کو پرامن احتجاج کا آئینی حق حاصل ہے تاہم تمام جماعتوں سے اپیل کی ہے کہ وہ سڑکیں بند نہ کریں اور ایسے اقدامات سے گریز کریں جس سے مریضوں اور بچوں کے آنے جانے میں مشکل ہو۔ ایک بیان میں، شرجیل انعام میمن نے کہا کہ مظاہرے، جلسے، جلوس یا جو بھی جماعت احتجاج کرنا چاہتی ہے، وہ حکومت کو مطلع کرکے کھلے میدانوں یا ایسی جگہوں پر احتجاج کرے جہاں عوام کو مشکلات کا سامنا نہ ہو۔

احتجاج اور اختلاف رائے ہر جمہوریت کی روح ہوتا ہے، مگر احتجاج ایسا نہ ہو کہ وہ عوام کے لیے باعث پریشانی ہو۔ شرجیل انعام میمن نے کہا کہ جو مویشی اور لائیو اسٹاک ٹرانسپورٹ ہو رہے ہیں سڑکیں بند ہونے کی وجہ سے ان کے خوراک کے بھی مسائل پیدا ہو رہے ہیں،عوام اس وقت مختلف چیلنجز کا شکار ہیں۔

(جاری ہے)

ہر تنظیم اور گروپ سے مودبانہ گزارش ہے کہ سڑکیں بند نہ کریں۔ شرجیل انعام میمن نے کہا کہ اس طرح احتجاج کیا جائے کہ عوام کی جان و مال محفوظ رہے، اور ان عام شہریوں کو کسی قسم کی مشکلات یا پریشانی کا سامنا نہ کرنا پڑے، ایسے اقدامات سے گریز کرنا چاہیے جو اسپتال جانے والے مریضوں، اسکول جانے والے بچوں یا روزگار کے لیے نکلنے والے افراد کی راہ میں رکاوٹ بنیں۔