بجلی کی پیداواری مشینری کی درآمدات میں جاری مالی سا ل کے پہلے 9 ماہ میں 64 فیصد کااضافہ

بدھ 23 اپریل 2025 14:41

اسلام آباد (اُردو پوائنٹ اخبارتازہ ترین - اے پی پی۔ 23 اپریل2025ء) بجلی کی پیداواری مشینری کی درآمدات میں جاری مالی سا ل کے پہلے 9 ماہ میں سالانہ بنیادوں پر 64 فیصد کااضافہ ہوا ہے۔ ادارہ برائے شماریات پاکستان کے اعدادوشمارکے مطابق مالی سال کے پہلے 9 ماہ میں بجلی کی پیداواری مشینری کی درآمدات پر 485 ملین ڈالر کازرمبادلہ خرچ ہوا جو گزشتہ مالی سا ل کی اسی مدت کے مقابلہ میں 64 فیصد زیادہ ہے۔

گزشتہ مالی سال کی اسی مدت میں بجلی کی پیداواری مشینری کی درآمدات کا حجم 296 ملین ڈالر ریکارڈکیاگیا۔

(جاری ہے)

مارچ میں بجلی کی پیداواری مشینری کی درآمدات پر 45 ملین ڈالر زرمبادلہ خر چ ہوا جو گزشتہ سا ل مارچ کے 28 ملین ڈالر کے مقابلہ میں 58 فیصد زیادہ ہے۔ فروری کے مقابلہ میں مارچ میں بجلی کی پیداواری مشینری کی درآمدات کے حجم میں ماہانہ بنیادوں پر 9 فیصد کی کمی ہوئی ۔ فروری میں بجلی کی پیداواری مشینری کی درآمدات کا حجم 49 ملین ڈالر ریکارڈکیاگیا جو مارچ میں کم ہو کر 45 ملین ڈالر ہو گیا۔ واضح رہے کہ مالی سال کے پہلے 9 ماہ میں مشینری گروپ کی مجموعی درآمدات کا حجم 6.650 ارب ڈالر ریکارڈکیاگیا ہے جو گزشتہ مالی سا ل کی اسی مدت کے 5.85 ارب ڈالر کے مقابلہ میں 14 فیصد زیادہ ہے۔