لاہور میں بجلی پیدا کرنے والی ملک کی پہلی سڑک تیار کرلی گئی

صوبائی دارالحکومت میں بننے والی سٹرک کو روٹ 47 کا نام دیا گیا ہے جس کی لمبائی 4.5 کلومیٹر بتائی گئی

ساجد علی بدھ 23 اپریل 2025 17:02

لاہور ( اُردو پوائنٹ اخبارتازہ ترین۔ 23 اپریل 2025ء ) صوبہ پنجاب کے دارالحکومت لاہور میں بجلی پیدا کرنے والی ملک کی پہلی سڑک تیار کرلی گئی۔ میڈیا رپورٹس کے مطابق اس منصوبے کی لاگت کا تخمینہ 9 ارب روپے یعنی تقریباً 32 ملین امریکی ڈالر تھا، اس منصوبے کیو پنجاب سنٹرل بزنس ڈسٹرکٹ ڈویلپمنٹ اتھارٹی (سی بی ڈی پنجاب) نے مکمل کیا، جس کے بارے میں حکام کا کہنا ہے کہ انہوں نے ملک کی سب سے جدید سمارٹ سڑک کی تعمیر مکمل کرلی ہے جو شہر کے وسط میں واقع ہے، اس سٹرک کو روٹ 47 کا نام دیا گیا ہے، جس کی لمبائی 4.5 کلومیٹر ہے جو کلمہ چوک کو بشمول فیروز پور روڈ، گلبرگ مین بلیوارڈ، والٹن روڈ اور لاہور رنگ روڈ سمیت شہر کی کئی بڑی شاہراہوں کو جوڑتی ہے۔

اس حوالے سے سی بی ڈی پنجاب کے سی ای او عمران امین نے کہا کہ سڑک ملک کے جدید ترین تجارتی ضلع کا مرکزی بلیوارڈ ہے، یہ بین الاقوامی معیارات پر پورا اترتی ہے اور اس میں کئی اسمارٹ خصوصیات شامل ہیں، اس سڑک میں تقریباً ایک کلومیٹر کا فلائی اوور شامل ہے، اس میں پیدل چلنے والوں اور سائیکل سواروں کے لیے الگ الگ لین ہیں، سڑک کو بارشوں کے دوران پانی کے جمع ہونے سے روکنے کے لیے ڈیزائن کیا گیا ہے، روٹ 47 کے ساتھ فٹ پاتھوں پر سولر پینل لگائے جا رہے ہیں جو سایہ فراہم کریں گے اور ایک میگا واٹ تک بجلی پیدا کریں گے۔

(جاری ہے)

دوسری طرف لاہور کو تجاوزات سے پاک اور خوبصورت شہر بنانے کے لیے ڈپٹی کمشنر لاہور سید موسیٰ رضا کی نگرانی میں شہر بھر میں انسداد تجاوزات آپریشن جاری ہے، جس کے تحت مختلف علاقوں میں تجاوزات کا مکمل صفایا کیا گردیا، آپریشن کے دوران جوبلی ٹاؤن، ملتان روڈ، ٹھوکر نیاز بیگ، مین مارکیٹ گلبرگ، کرشن نگر، ٹائون شپ، بادامی باغ، شیرشاہ روڈ، شاہدرہ چوک سے کالا خطائی روڈ اور جی ٹی روڈ کے دونوں اطراف سمیت متعدد مقامات پر تجاوزات کو ہٹا دیا گیا۔