بھارت کو خبردار کر رہی ہوں، فالس فلیگ کی آڑ میں مہم جوئی کا انجام خطرناک ہوگا‘عظمیٰ بخاری

پاکستان کو کسی بھی ممکنہ جارحیت کے لیے تیار پایا جائیگا،پچھلی دفعہ ہم نے چائے پلا کے بھیجا تھا اس دفعہ شاید اتنی مروت نہ ہو بھارتی عوام اپنی حکومت سے سوال کر رہے ہیں: سات لاکھ فوج کے باوجود حملہ کیسے ہوا‘وزیر اطلاعات پنجاب کا ردعمل

بدھ 23 اپریل 2025 20:20

بھارت کو خبردار کر رہی ہوں، فالس فلیگ کی آڑ میں مہم جوئی کا انجام خطرناک ..

لاہور (اُردو پوائنٹ اخبارتازہ ترین - این این آئی۔ 23 اپریل2025ء) وزیر اطلاعات پنجاب عظمیٰ بخاری نے بھارت کو خبردار کرتے ہوئے کہا ہے کہ فالس فلیگ کی آڑ میں مہم جوئی کا انجام خطرناک ہوگا،پچھلی دفعہ ہم نے چائے پلا کے بھیجا تھا اس دفعہ شاید اتنی مروت نہ ہو،کسی بھی ملک میں دہشت گردی ہو پاکستان نے ہمیشہ اس کے خلاف کھڑا رہا ہے،بھارتی عوام اپنی حکومت سے سوال کر رہے ہیں: سات لاکھ فوج کے باوجود حملہ کیسے ہوا ۔

انہوںنے بھارتی فالس فلیگ کے حالیہ ڈرامے پر ردعمل دیتے ہوئے ایک دیڈیو بیان جاری کیا جس میں انہوں نے بھارتی حکومت کو سخت تنبیہ کی ہے کہ پاکستان کو کسی بھی ممکنہ جارحیت کے لیے تیار پایا جائے گا۔عظمیٰ بخاری نے واقعے پر افسوس کا اظہار کرتے ہوئے کہا کہ بھارتی عوام خود سوال اٹھا رہے ہیں کہ سری نگر جیسے حساس علاقے میں، جہاں سات لاکھ بھارتی فوج تعینات ہے، اس نوعیت کا حملہ کیسے ممکن ہوا انہوں نے کہا کہ بھارتی شہری اب یہ بھی پوچھ رہے ہیں کہ پچھلے حملوں کی رپورٹس کہاں گئیں یہ تمام سوالات خود بھارت کے اندر سے اٹھ رہے ہیں، جو اس واقعے کو فالس فلیگ قرار دینے کے لیے کافی ہیں۔

(جاری ہے)

وزیر اطلاعات نے کہا کہ یہ ہمیشہ کی طرح ایک بزدلانہ کوشش ہے، اور بھارت نے ماضی میں بھی ایسے ہی حربے آزمائے ہیں تاکہ الزام پاکستان پر لگایا جا سکے۔''انہوں نے بھارت کی جانب سے دی جانے والی دھمکیوں کو مسترد کرتے ہوئے کہا کہ میں نے سنا ہے کہ گیدڑ بھبکیاں دی جا رہی ہیں۔ ہماری چائے واقعی بہت اچھی ہے لیکن ہم ہر بار چائے نہیں پلایا کرتے۔

ایک آدھ بار مہمان آ جائے تو خیر ہے، لیکن اگر مہمان زیادہ ہوں تو پاکستان کی فوج، عوام اور حکومت اس کا جواب دینا خوب جانتے ہیں۔عظمیٰ بخاری نے خبردار کیا کہ اگر بھارت اس فالس فلیگ کو بنیاد بنا کر کسی قسم کی مہم جوئی کا ارادہ رکھتا ہے تو یہ اس کی بہت بڑی بھول ہوگی۔ انہوں نے کہا کہ ماضی کی طرح اس بار بھی پاکستان ہر سطح پر مؤثر جواب دے گا۔انہوں نے واضح کیا کہ الحمدللہ، پاکستان نے ماضی میں ہر بار بھارت کو دھول چٹائی ہے، اور آئندہ بھی اپنے دفاع کے لیے ہر حد تک جائے گا۔