گھر کے باغیچہ میں کاشت کی گئی سبزیاں سپرے اور دیگر غلاظتوں سے پاک ہوتی ہیں، محکمہ زراعت

جمعرات 24 اپریل 2025 11:50

سیالکوٹ (اُردو پوائنٹ اخبارتازہ ترین - اے پی پی۔ 24 اپریل2025ء) گھریلوپیمانے پر سبزیوں کی کاشت کا مشغلہ نہ صرف انسانی صحت کےلئے اکسیرکی حیثیت رکھتاہے بلکہ یہ انسان کے جسم اور دماغ کو توانا رکھنے میں بھی اہم کردار کا موجب ہوتاہے کیونکہ گھر کے باغیچہ میں کاشت کی گئی سبزیاں سپرے اور دیگر غلاظتوں سے پاک ہوتی ہیں لہذاعوام کو چاہئیے کہ وہ بازاری سبزیوں کی خرید سے بچنے اور اپنی صحت کو بہترین حالت میں رکھنے کےلئے کچن گارڈننگ کو فروغ دیں۔

یہ بات ایگری کلچر آفیسر (مرکز صدر)حمیرا یونس نے”اے پی پی“سے گفتگو کرتے ہوئے کہی۔انہوں نے مزید کہا کہ اگرگھریلو پیمانے پر سبزیوں کی کاشت کےلئے جگہ دستیاب نہ ہو تو ضرورت کےلئے گملوں، کھلے ڈبوں، پلاسٹک یالکڑی کژی ٹرے میں بھی سبزیاں اگائی جاسکتی ہیں۔

(جاری ہے)

انہوں نے بتایا کہ گھریلو پیمانے پر چھوٹے پلاٹوں میں ایسی سبزیاں کاشت کی جائیں جو کافی دیر تک پیداوار دینے کی صلاحیت رکھتی ہوں، پالک، دھنیا، میتھی، گوبھی، ٹماٹر، شلجم، گاجر، مولی جیسی سبزیاں تین سے پانچ مرلہ کے پلاٹ میں باآسانی کاشت کی جاسکتی ہیں۔

انہوں نے بتایاکہ ان سبزیوں کےلئےپینے کا گھریلوپانی بھی استعمال کیاجاسکتاہے ‘سبزیاں کاشت کرنے کے بعد انہیں پانی دیتے وقت اس بات کاخیال رکھاجائے کہ پانی کھیلیوں سے اوپرنہ جائے۔