Live Updates

چیئرپرسن فرنڈز آف کشمیر انٹرنیشنل غزالہ حبیب کا سینیٹ آف پاکستان کی قرارداد کا خیر مقدم

جمعہ 25 اپریل 2025 14:10

اسلام آباد (اُردو پوائنٹ اخبارتازہ ترین - اے پی پی۔ 25 اپریل2025ء) چیئرپرسن فرنڈز آف کشمیر انٹرنیشنل غزالہ حبیب نے سینیٹ آف پاکستان کی قرارداد کا خیر مقدم کرتے ہوئے کہا ہے کہ قومی سلامتی کمیٹی کا اعلامیہ بھی خوش آئند ہے۔جمعہ کو جاری بیان میں غزالہ حبیب نے کہا کہ بھارت کے شیطانی ڈرامے کو مسترد کرتے ہیں،بھارت ہمیشہ مذموم ہتھکنڈے استعمال کرتا آیا ہے،تاریخ گواہ ہے کہ جب بھی کسی غیر ملکی سربراہ نے بھارت کا دورہ کیا تو وہ ایسے ڈرامہ رچاتا ہے۔

(جاری ہے)

غزالہ حبیب نے کہا کہ بھارت دنیا کے سامنے اپنے آپ کو مظلوم بنا کر پیش کرتا ہے،بھارت خود ایک دہشت گرد ریاست ہے۔انہوں نے کہا کہ بھارت کینیڈا میں نجر کے قتل میں ملوث ہے،امریکامیں گرپنت سنگھ پنو پر حملے میں ملوث ہے،جموں و کشمیر میں ساڑھے دس لاکھ قابض فوج کشمیریوں پر تعینات ہے،حریت کانفرنس کی پوری قیادت بھارتی جیلوں میں نظر بند ہے۔غزالہ حبیب نے کہا کہ مسرت عالم ، شبیر شاہ ، آسیہ اندرابی ، قاسم فکتو، فہمیدہ صوفی سمیت سیاسی رہنماؤں کی ایک طویل فہرست ہے جو بھارتی جیلوں میں پابند سلاسل ہیں،نہتے کشمیریوں پر جدید ہتھیاروں سے حملہ آور ہونے والی بھارتی فوج دہشت گرد ہیں۔