Live Updates

پاکستانی قوم شہادت کے جذبہ سے سرشار ہے ،کسی قربانی سے پیچھے نہیں ہٹے گی ، آمنہ سردار

جمعہ 25 اپریل 2025 19:00

ایبٹ آباد (اُردو پوائنٹ اخبارتازہ ترین - اے پی پی۔ 25 اپریل2025ء) مسلم لیگ (ن) کی سابق رکن خیبر پختونخوا اسمبلی آمنہ سردار نے کہا ہے بھارت نےپاکستان کو نیچا دکھانے اور پراپیگنڈا کرنے کا کوئی موقع ہاتھ سے جانے نہیں دیا ،مقبوضہ وادی کشمیر پہلگام واقعہ پر ایک بار پھر عالمی برادری کی ہمدردی حاصل کرنے کے لئے پاکستان پر الزامات کی بوچھاڑ کی ہے جس پرقومی سلامتی کمیٹی میں جارحانہ جواب بھارت کی آنکھیں کھولنے کے لئے کافی ہے۔

جمعہ کو یہاں ’’اے پی پی‘‘ سے بات چیت کرتے ہوئے آمنہ سردار نے کہا ہے کہ سیاسی اور عسکری قیادت ایک پیج پر ہے ،قوم بھی افواج پاکستان کے شانہ بشانہ کھڑی ہے۔آمنہ سردار نے کہاکہ بھارت نے مقبوضہ وادی پر غاصبانہ قبضہ کرکے اقوام متحدہ کی قرارداد کو تسلیم نہیں کیا جو دنیا کے اس بڑے ادارے کے لئے سوالیہ نشان ہے،جس کی بات اور فیصلے کو اہمیت نہیں دی گئی۔

(جاری ہے)

انہوں نے کہا ہے کہ بھارت کا مکروہ چہرہ دنیا کے سامنے متعدد مرتبہ بے نقاب ہوا ہے جہاں اقلیت کے حقوق ہمیشہ جبر اور تشدد سے مسخ کئے گئے ہیں،موجودہ صورتحال میں قومی سلامتی کونسل کا سخت موقف عوام کے دل کی آواز ہے،پاکستان کی افواج صلاحتیوں میں کسی سے پیچھے نہیں ہے ،فوج کے پاس جدید ٹیکنالوجی سے آراستہ ہتھیار موجود ہیں جو دشمن کو ناکوں چنے چبوا کر دنیا کے سامنے ان کو رسوا کر سکتے ہیں ۔انہوں نے کہا کہ پاکستانی قوم شہادت کے جذبہ سے سرشار ہے اور وہ کسی قربانی سے پیچھے نہیں ہٹے گی ۔