کراچی میں 28 اپریل سے شروع ہونے والے انٹرمیڈیٹ کے سالانہ امتحانات مؤخر

اعلیٰ ثانوی تعلیمی بورڈ کراچی نے چیئرمین کی ہدایت پر امتحانات کی تاریخ میں دو وجوہات کی بناء پر تبدیلی کردی

ساجد علی ہفتہ 26 اپریل 2025 13:16

کراچی ( اُردو پوائنٹ اخبارتازہ ترین۔ 26 اپریل 2025ء ) صوبہ سندھ کے دارالحکومت کراچی میں 28 اپریل سے شروع ہونے والے انٹرمیڈیٹ کے سالانہ امتحانات مؤخر کردیئے گئے۔ تفصیلات کے مطابق اعلیٰ ثانوی تعلیمی بورڈ کراچی نے چیئرمین کی ہدایت پر 28 اپریل سے شروع ہونے والے انٹرمیڈیٹ کے سالانہ امتحانات برائے 2025ء مؤخر کردیئے ہیں اور اب یہ امتحانات 5 مئی 2025ء سے شروع ہوں گے۔

بتایا گیا ہے کہ امتحانات کی تاریخ میں تبدیلی دو وجوہات کی بناء پر کی گئی ہے جن میں ایک وجہ یہ ہے کہ خصوصی کمیٹی کی سفارشات کی روشنی میں انٹرمیڈیٹ حصہ اول کے سالانہ امتحانات برائے 2024ء کے سائنس پری میڈیکل، پری انجینئرنگ اور سائنس جنرل گروپس کے تمام طلبہ کو ریاضی، کیمسٹری اور فزکس کے پرچوں میں گریس مارکس دینے کا عمل جاری ہے جب کہ دوسری وجہ میٹرک اور انٹر کے کچھ ایسے امتحانی مراکز ہیں جن میں 8اپریل سے میٹرک کے امتحانات جاری ہیں جو 8مئی 2025ء تک جاری رہیں گے، اس لیے امتحانی نظام کو منظم رکھنے اور مراکز کی دستیابی کو یقینی بنانے کیلئے انٹر میڈیٹ کے امتحانات کے آغازکی تاریخ میں تبدیلی کی گئی۔

(جاری ہے)

دوسری طرف محکمہ سکولز ایجوکیشن پنجاب نے صوبے بھرمیں بڑھتے ہوئے درجہ حرارت کے باوجود سکولوں میں شیدول کے مطابق یکم جون سے ہی گرمیوں کی تعطیلات کا اعلان کردیا، سیکرٹری سکول ایجوکیشن خالد نذیر وٹو کا کہنا ہے کہ درجہ حرارت میں اگر غیر معمولی اضافہ ہوا تو ممکن ہے چھٹیاں ایک ہفتہ پہلے ہی دے دی جائیں، اگر موسم نے مزید شدت اختیار کی تو موجودہ شیڈول پر نظرثانی بھی کی جا سکتی ہے، یہ فیصلہ والدین، طلبہ اور اساتذہ کی صحت کو مدنظر رکھتے ہوئے کیا گیا ہے کیوں کہ شدید گرمی بچوں کی تعلیمی سرگرمیوں کو متاثر کر سکتی ہے۔