Live Updates

عازمین حج کیلئے نئی ہدایات جاری، مخصوص کارڈ کا حصول لازمی قرار

قوانین کی خلاف ورزی پر منیٰ، عرفات اور مزدلفہ میں داخلے سے روک دیا جائے گا

ساجد علی ہفتہ 26 اپریل 2025 13:32

عازمین حج کیلئے نئی ہدایات جاری، مخصوص کارڈ کا حصول لازمی قرار

اسلام آباد ( اُردو پوائنٹ اخبارتازہ ترین۔ 26 اپریل 2025ء ) پاکستان سے فرضہ حج کی سعادت کے لیے جانے والے عازمین کیلئے نئی ہدایات جاری کرتے ہوئے مخصوص کارڈ کا حصول لازمی قرار دے دیا گیا۔ تفصیلات کے مطابق وزارت مذہبی امور نے عازمین حج کو سعودی عرب روانگی سے قبل گردن توڑ بخار، فلو، پولیو سے بچاؤ کی ویکسین لازمی لگوانے کی ہدایت جاری کی ہیں، تمام عازمین حج کو اپنے نزدیکی حاجی کیمپ سے یہ ویکسین مفت میں لگوا کر پیلا کارڈ حاصل کرنا ضروری ہے، پیلے کارڈ کے بغیر سعودی عرب میں داخلہ ممکن نہیں ہوگا۔

وزارت مذہبی امور کا کہنا ہے کہ 65 سال سے زائد عمر کے عازمین اپنا پرانا کورونا ویکسین کارڈ بھی ہمراہ رکھیں، اگر یہ کارڈ موجود نہ ہو تو انہیں وزارت مذہبی امور کے نزدیک حاجی کیمپ سے کورونا ویکسین لگوا کر نیا کارڈ حاصل کرنا ہوگا، اس کے علاوہ تمام عازمین حج کو خبردار کیا جاتا ہے کہ وہ صرف مستند حج اجازت نامہ کے ساتھ سعودی عرب کا سفر کریں، جعلی کمپنیاں اور غیر قانونی اشتہارات حجاج کو اجازت نامے کے جعلی وعدوں کے ساتھ دھوکہ دے رہے ہیں۔

(جاری ہے)

وزارت نے مزید کہا ہے کہ غیر قانونی حج اجازت ناموں کے نتیجے میں سعودی حکام کی جانب سے حراست، جرمانے یا ملک بدری کا سامنا ہو سکتا ہے اور مقدس مقامات جیسے منیٰ، عرفات اور مزدلفہ میں داخلے سے انکار کیا جا سکتا ہے، غلط اجازت ناموں سے عازمین کو مالی نقصان بھی ہو سکتا ہے کیوں کہ ان غیر مستند حج پیکیجوں کے لیے ادا کی گئی رقم کی واپسی نہیں کی جائے گی، اس لیے آئیے ہم سب کے لیے ایک محفوظ، جائز اور روحانی طور پر بھرپور حج کو یقینی بنائیں، جس کے لیے عازمین حج سے درخواست ہے کہ وہ صرف مستند ذرائع سے ہی حج کی تیاری کریں اور تمام ضروری ہدایات پر عمل کریں۔