Live Updates

اب عدنان سمیع خان کا کیا ہوگا؟ فواد چوہدری کے سوال نے گلوکار کو تپا دیا

دونوں سوشل میڈیا پر آمنے سامنے آگئے اور ایک دوسرے پر لفظی گولہ باری کردی

ساجد علی ہفتہ 26 اپریل 2025 16:14

اب عدنان سمیع خان کا کیا ہوگا؟ فواد چوہدری کے سوال نے گلوکار کو تپا ..

لاہور ( اُردو پوائنٹ اخبارتازہ ترین۔ 26 اپریل 2025ء ) سابق وفاقی وزیر فواد چوہدری اور گلوکار عدنان سمیع خان سوشل میڈیا پر آمنے سامنے آگئے، ایک دوسرے پر لفظی گولہ باری کردی۔ تفصیلات کے مطابق پہلگام حملے کے بعد بھارتی حکومت نے تمام پاکستانی شہریوں کو بھارت چھوڑنے کا حکم دیا تو اس پر سابق وفاقی وزیر فواد چوہدری نے طنز انداز اپناتے ہوئے سوال کر ڈالا کہ ’اب عدنان سمیع خان کا کیا ہوگا؟‘ جس پر عدنان سمیع بھی خاموش نہ رہے اور انہوں نے بھی سابق وفاقی وزیر کو ان پڑھ اور جاہل قرار دے دیا۔

فواد چوہدری نے اپنی پوسٹ میں دعویٰ کیا کہ ’عدنان سمیع خان کا آبائی تعلق لاہور سے تھا‘، جس پر گلوکار نے بتایا کہ ’ان کا تعلق لاہور نہیں بلکہ پشاور سے ہے‘، عدنان سمیع خان نے مزید لکھا کہ ’فواد چوہدری وزیر انفارمیشن کے قابل نہیں بلکہ مس انفارمیشن کے لائق ہیں‘، اس موقع پر انہوں نے فواد چوہدری ک ے لیے نامناسب زبان بھی استعمال کی اور لکھا کہ ’وہ جانتے ہیں کہ ان نام کے ساتھ انگریزی کے الفاظ CH کا کیا مفہوم ہے‘، صرف یہی نہیں بلکہ عدنان سمیع خان کو فواد چوہدری کی جانب سے سوال اٹھائے جانے پر اتنا برا لگا کہ انہوں نے سابق وفاقی وزیر کے لیے غبارے کا لفظ بھی استعمال کیا، فواد چوہدری نے عدنان سمیع خان کی پوسٹ پر رد عمل دیتے ہوئے ان کی صحت یابی کے لیے دعا کی اور لکھا کہ لگتا ہے کہ ’واقعی عدنان سمیع خان کے غبارے سے ہوا نکل گئی‘۔

(جاری ہے)

یاد رہے کہ عدنان سمیع خان کے والد 1942ء میں پشاور میں پیدا ہوئے، عدنان سمیع خان نے 2014ء کے بعد پاکستان چھوڑا اور انہیں انڈیا نے 2015ء میں شہریت دینے کا فیصلہ کیا اور انہیں یکم جنوری 2016ء کو بھارتی شہریت دی گئی جس پر اداکار نے جشن بھی منایا اور اس کے بعد سے گزشتہ ایک دہائی سے زائد عرصے سے وہ بھارتی شہری ہیں۔