Live Updates

لندن میں پاکستانی ہائی کمیشن پر حملے کی منظم کوشش ناکام

شرپسندوں نے عمارت کے شیشے توڑ دیئے، سرخ رنگ بھی پھینکا گیا

ساجد علی اتوار 27 اپریل 2025 14:00

لندن میں پاکستانی ہائی کمیشن پر حملے کی منظم کوشش ناکام

اسلام آباد/لندن ( اُردو پوائنٹ اخبارتازہ ترین۔ 27 اپریل 2025ء ) پہلگام میں فالس فلیگ آپریشن کے نتیجے میں لندن میں پاکستانی ہائی کمیشن پر حملے کی منظم کوشش ناکام بناتے ہوئے بھارت کا ایک اور مذموم منصوبہ بے نقاب ہو گیا۔ میڈیا رپورٹس کے مطابق پاکستانی ہائی کمیشن پر حملہ کرنے کے لیے 300 سے 400 شرپسندوں کو اکٹھا کیا گیا، شرپسندوں نے ہائی کمیشن کی عمارت کے شیشے توڑ دیئے اور عمارت پر سرخ رنگ بھی پھینکا، واقعے کے بعد پاکستانی ہائی کمیشن کے عملے نے پولیس کو اطلاع دی، جس نے واقعے میں ملوث شرپسندوں کی تلاش شروع کردی۔

ذرائع کا کہنا ہے کہ بھارتی انتہا پسندوں اور اسرائیلیوں کوبھارتی خفیہ ایجنسی کے کہنے پر اکٹھا کیا گیا تھا، شرپسندوں میں سے چار نقاب پوش افراد کو بلندی پر پاکستانی پرچم اتارنے کا کام سونپا گیا، قومی پرچم کی حفاظت کے لیے پاکستانی ہائی کمیشن کے 6 اہلکار پہلے سے موجود تھے، صورتحال کی نزاکت کا اندازہ کرتے ہوئے مزید پاکستانی جائے وقوعہ پر پہنچ گئے اور سفارتی عملہ کے ساتھ شامل ہو گئے جنہوں نے مظاہرین کا مقابلہ کرنے کے لیے قومی نغمے پڑھنے شروع کر دیئے، پاکستانی ہائی کمیشن کے اہلکاروں نے قومی پرچم کا بھرپور طریقے سے دفاع کیا۔

(جاری ہے)

ذرائع نے بتایا کہ 15 سے 20 اسرائیلی اہلکار پہلے ہی بھارتی کے غیر قانونی طور پر مقبوضہ جموں و کشمیر سری نگر پہنچ چکے ہیں، دفاعی ماہرین کا کہنا ہے کہ بھارت اور اسرائیل کی یہ ملی بھگت ثابت کرتی ہے کہ وہ پاکستان اور بالعموم مسلمانوں کے خلاف متحد ہیں، اسرائیل جو پہلے ہی فلسطینی مسلمانوں پر مظالم ڈھا رہا ہے، اب معصوم کشمیریوں کی نسل کشی کے مقصد سے اپنی کارروائیاں کشمیر تک بڑھا دی ہیں، یہ تعاون مزید ثابت کرتا ہے کہ بھارتی وزیر اعظم نریندر مودی اور اسرائیلی وزیر اعظم بنجمن نیتن یاہو ایک دوسرے کے قریب ہو گئے ہیں، بھارت کو یہ سمجھ لینا چاہیے کہ اس طرح کے حملے بیرون ملک اس کے اپنے ہائی کمیشنوں پر بھی ہو سکتے ہیں۔